Stefanel

Stefanel S.p.A. is 'n Italiaanse mode-etiket wat in 1959 deur Carlo Stefanel (1925−1987) gevestig is en bekendheid verwerf het met sy breimodes en toebehore vir dames. Tot en met 2011 is ook mode vir mans onder die handelsmerk aangebied. Stefanel, wat sy hoofkwartier in Ponte di Piave in die provinsie Treviso het, beskik oor modewinkels in verskeie Europese lande en Suid-Korea. In die vroeë 21ste eeu het Stefanel, onder meer as gevolg van sterk mededinging deur ander modewinkelkettings soos die Spaanse onderneming Zara, en vanaf 2008, toe die Italiaanse ekonomie deur die internasionale finansiële krisis swaar getref is, verskeie kere in finansiële moeilikhede beland.

Stefanel
Stefanel-logo2016.png
Stefanel in SM Aura, BGC.jpg
Tipe Korporasie
Gestig 1959
Hoofkantoor Ponte di Piave, TrevisoItalië
SleutelpersoneCarlo Stefanel (stigter)
Giuseppe Stefanel (president)
Stefano Visalli (tussentydse hoof- uitvoerende beampte)
Gebied bedienWêreldwyd
IndustrieMode
ProdukteDamesklere
Inkomste€125,3 miljoen (2017)[1]
Werknemers1 030 (2015)
MoedermaatskappyOxy en Attestor fondse (met 71%)
Webwerfstefanel.com

Stefanel word deur baie ekonome, analiste, beleggers en bankiers intussen as "zombie-onderneming" geklassifiseer wat slegs deur goedkoop lenings aan die lewe gehou word. In die tienjaarperiode tot 2017 het die onderneming in nege jare verliese gely.[2][3] In Januarie 2019 is die onderneming deur 'n geregshof in Treviso tyd gegun tot 15 April van dieselfde jaar om 'n plan vir sy herstrukturering voor te lê.[4] Die termyn is intussen met sestig dae verleng.

GeskiedenisWysig

Die onderneming se oorsprong strek terug tot 1947 toe Carlo Stefanel met die vervaardiging en bemarking van sy eie wolmengsel en tekstielstowwe in die omgewing van Treviso begin het. Hiervoor het hy markstalletjies in 'n aantal nedersettings bedryf. Aanvanklik het hy wol en stowwe per fiets vervoer. Kort voor lank het hy genoeg inkomste behaal om 'n klein motor te koop wat hy tot 'n vragwa omgebou het.

Twaalf jaar later het hy vier breimasjiene gekoop, wat hy in sy huis in Oderzo geïnstalleer het, en sy eie mode-onderneming, Maglificio Piave, in Ponte di Piave gevestig, met groothandelars in Italië en ander Europese lande as sy klante. Nadat sy seun Giuseppe in 1970 tot die onderneming toegetree het, is met die ontwerp en bemarking van mode onder die nuutgevestigde Stefanel-handelsmerk begin. Stefanel se modereekse is nou regstreeks aan kleinhandelaars verkoop.

In 1979 het die onderneming sy eie kleinhandelkonsep ontwikkel en die eerste konsessiesake is geopen. Die eerste modewinkel in besit van die onderneming is in die volgende jaar in Siena gevestig, terwyl die onderneming se naam na Stefanel gewysig is. Die eerste boetiek buite Italië is in 1982 in Parys geopen. Een jaar later is die besluit geneem om Stefanel-modereekse uitsluitlik in die onderneming se eie kleinhandel-netwerk te verkoop. Toe Stefanel in 1987 tot die Noord-Amerikaanse mark toegetree het met nuwe winkels in New York en op die Bermuda-eilande, was daar reeds sowat 800 Stefanel-modewinkels en is die onderneming se aandele vir die eerste keer aan die Milaanse effektebeurs genoteer.

Nadat 'n gemeenskaplike onderneming met Onward Kashima gevestig is, het Stefanel tot die Oos-Asiatiese mark toegetree met nuwe boetieke in Japan, Suid-Korea, die Republiek China (Taiwan) en die Volksrepubliek China. Verder is die onderneming Compagnia Finanziaria Moda oorgeneem om met die vervaardiging van modereekse onder lisensie te begin. In 1990 is lisensies vir die jeans-handelsmerke Marithé en François Girbaud verwerf en 'n gemeenskaplike onderneming gevorm om in vennootskap met die Italiaanse modeontwerper Romeo Gigli die nuwe G Gigli-modereeks in die middelpryssegment te loods. Die vennootskap met Gigli het tot 1999 bestaan.

In 1995 is 'n gemeenskaplike onderneming met die Amerikaanse modehuis Calvin Klein begin om die CK-winkelketting in Europa te ontwikkel wat tot 2000 bestaan het. In dié jaar is die Duitse modehuis Hallhuber oorgeneem wat tot 2009 in besit van Stefanel was. Twee jaar later is die onderneming se omset vedriedubbel met die oorname van vyftig persent van die aandele van die Nuance Groep, 'n Switserse onderneming wat doeanevrye ondernemings in lughawens bedryf. Giuseppe Stefanel het sy bestaande aandele aan Stefanel (57 persent) begin vergroot en pogings onderneem om nuwe lewe in die Stefanel-handelsmerk te blaas.

VerwysingsWysig

  1. Vittoria Puledda (13 Augustus 2018). "L'estate fredda di Stefanel, ritardi sul piano industriale tempi lunghi per il nuovo ad" (in Italiaans). Affari&Finanza. Geargiveer vanaf die oorspronklike op 28 Augustus 2018. Besoek op 28 Augustus 2018.
  2. ZeroHedge, 17 November 2017: How Corporate Zombies Are Threatening The Eurozone Economy. Besoek op 18 Januarie 2019
  3. Capital, 17 November 2017: Zombiefirmen suchen Europas wirtschaftliche Erholung heim. Besoek op 18 Januarie 2019
  4. La Tribuna di Treviso, 11 Januarie 2019: Stefanel, scongiurato per ora il fallimento, timori per Ponte di Piave. Besoek op 18 Januarie 2019