String (rekenaarwetenskap)

'n String in rekenaarprogrammering is 'n reeks karakters, hetsy as 'n literale konstante of as 'n veranderlike. Laasgenoemde mag toelaat dat sy elemente gemuteer en sy lengte verander word, of dit mag na skepping onveranderlik wees. 'n String word gewoonlik as 'n datatipe beskou en word gewoonlik as 'n skikking van grepe (of woorde) geïmplementeer wat 'n reeks elemente, gewoonlik karakters, in 'n karakterkodering stoor.

Stringe word in byvoorbeeld bio-informatika toegepas om DNS-stringe te beskryf.

Afhangend van die programmeertaal en die presiese datatipe in gebruik kan 'n veranderlike wat as 'n string verklaar word, veroorsaak dat berging in geheue staties met 'n maksimumlengte geallokeer word, of van dinamiese allokasie gebruik maak om dit in staat te stel om 'n veranderlike aantal elemente te stoor.

Wanneer 'n string literaal in bronkode verskyn, staan dit as 'n stringliteraal of 'n anonieme string bekend.

In formele tale, wat in wiskundige logika en teoretiese rekenaarwetenskap gebruik word, is 'n string 'n eindige reeks simbole wat uit 'n versameling, bekend as 'n alfabet, gekies word.