Studentesentrum UP

Oor die jare het die Universiteit van Pretoria verskeie studentesentrums gehad, maar soos die studentegetalle toegeneem het, het almal onvoldoende geword. 'n Nuwe Studentesentrum, wat deur Philip Viljoen ontwerp is, kon gebou word nadat Roperstraat in 1993 gesluit is. Dit was grootliks deur Sasol en ander donateure geborg en is amptelik in Augustus 1995 geopen. Die studentesentrum is die spilpunt van sosiale aktiwiteite vir die meeste studente. Dit huisves ’n ruim kafeteria, restaurante, koffiewinkels, kitsbanktellermasjiene (OTMs). Verskeie winkels is rondom ’n verhewe sirkulêre platform, die Piazza, gebou wat vir verskeie studenteaktiwiteite gebruik word. Die boumateriaal soos die betonblokke in sandsteenkleur en die rooi dakteëls is spesiaal gekies sodat die kompleks in harmonie met sy omgewing kan saamsmelt.