Teotokos van Wladimir
Die Teotokos van Wladimir (Grieks: Θεοτόκος του Βλαντίμιρ), ook bekend as "Ons Dame van Wladimir" (Russies: Владимирская Икона Божией Матери) of die "Maagd van Wladimir", is ’n Middeleeuse Bisantynse ikoon van Moeder en Kind. In 1169 het Andrei Bogoljoebski Kiëf geplunder en baie godsdienstige werke gesteel, onder meer ’n Bisantynse "Moeder van God"-ikoon wat na Wladimir gestuur is. Dit is een van die mees geëerde Oosters-Ortodokse ikone en ’n uitstekende en vroeë voorbeeld van die "Eleusa" (tederheid)-tipe, met die Kind wat teen sy moeder se wang nestel.[1]
Die Teotokos (’n Griekse term vir Maria) word beskou as die heilige beskermer van Rusland. Die ikoon word in die Tretjakof-galery in Moskou tentoongestel in ’n werkende kerk op die museumterrein. Haar feesdag is 23 Junie ou styl / 6 Julie nuwe styl. Die oorspronklike word al eeue lank oor en oor gekopieer, meer as enige ander beroemde ikoon, en baie kopieë het self aansienlike artistieke en godsdienstige betekenis.[2]
Anders as sommige ikone met ’n groot godsdienstige aanhang, word die artistieke gehalte van die werk hoog aangeskryf; die Wladimirskaja, soos die Russe dit noem, word algemeen beskou as die beste van die paar Bisantynse ikone uit dié tydperk wat nog bestaan. Volgens die kunshistorikus David Talbot Rice "erken almal wat dit gesien het dat dit een van die mees uitsonderlike godsdienstige skilderye in die wêreld is".[3]
Verwysings
wysig- ↑ "Tretyakov-gids": Tretjakof-galery; Gidsboek, 2000, Moskou, Avant-Garde, ISBN 5863941065
- ↑ Evans, Helen C. (red.), Byzantium, Faith and Power (1261-1557), 2004, Metropolitan Museum of Art/Yale University Press, ISBN 1588391140
- ↑ Rice, David Talbot, "The Greek Exhibition at Burlington House", The Burlington Magazine, Vol. 88, No. 517 (Apr., 1946), JSTOR