Terblanche Jordaan

Terblanche Jordaan (gebore 15 Julie 1963) is ’n Afrikaanse predikant, skrywer en dramaturg.

Terblanche Jordaan
Gebore	15 Julie 1963 (1963-07-15)
Nasionaliteit	Suid-Afrikaans
Alma mater	Universiteit van Pretoria Vrije Universiteit Amsterdam Universiteit van Suid-Afrika
Beroep	Skrywer, predikant
Eggenoot	Brümilda van Rensburg (1991–1994) Hermien de Klerk (2002–)

Lewe en werk

Terblanche Jordaan was ’n tyd lank leraar van die NG gemeente Tamboerskloof in Kaapstad.

Terblanche is op 15 Julie 1963 gebore as die oudste van drie kinders van mnr. en mev. Connie Jordaan. Hy behaal sy B.A.-graad in teologie aan die Universiteit van Pretoria en in 1988 sy B.D.-graad. In sy soeke na inligting neem hy ’n aantal ekstra klasse, waaronder kunsgeskiedenis, regsfilosofie en staatsleer en raak ook betrokke by die studenteorganisasie Nusas (National Union of South African Students). Hy studeer vanaf 1989 tot 1990 aan die Vrije Universiteit Amsterdam vir ’n meestersgraad in teologie en skryf ook in 2000 aan die Universiteit van Suid-Afrika in vir ’n meestersgraad in filosofie.

Hy raak ná sy studies betrokke by die destydse NG gemeente Jeppestown in die ooste van Johannesburg, die Nederlandssprekende gemeente in Parktown en die Terneuzen-gemeente in Amsterdam. In latere jare stig hy ’n onafhanklike nuwe gemeente in Kaapstad wat hy Kruiskerk noem, waarin die bediening in die gees van die Nuwe Hervorming en die mistieke staan. Na ’n aantal jare sluit hy in Junie 2008 aan by die Renaissance-gemeente in Durbanville, ’n onafhanklike kerk met gemeentes in Kaapstad en Pretoria.

In September 2010 het hy ’n ernstige hartaanval, waarna hy ’n driedubbele hartomleiding ondergaan. Sedert September 2011 is hy geestelike direkteur van die Neo-Spektrum vir Christelike spiritualiteit, waar hy kursusse aanbied en as leraar en berader optree.

Skryfwerk

Hy behartig die gereelde rubriek Metronoom, wat in die Jip-bylae van Die Burger verskyn en gemik is op die jeug. Hierdie rubrieke is baie gewild omdat dit aandag gee aan sosiale en ander sake wat vir die jeug belangrik is en ’n keur uit hierdie rubrieke word in die drie bundels gebundel, naamlik Metronoom, Metronoom II en Metronoom III. Hy skryf ook gedigte en sy godsdienstige gedigte word in Lewende water gepubliseer. In 1996 debuteer hy as dramaturg toe sy Die ander man by die Klein Karoo Nasionale Kunstefees opgevoer word. In hierdie drama gaan dit daaroor om te aanvaar wie jy is en verskyn die hoofkarakter deurentyd poedelnakend op die verhoog, simbolies van hoe elkeen van ons eintlik kaal is en slegs agter klere wegkruip om die regte mens te verberg. Hy volg hierdie drama op met Die soen en Om goodbye te sê. Laasgenoemde drama is ook in 2001 die eerste Afrikaanse drama wat in Londen (by Suid-Afrika Huis) opgevoer word. Sy kabarette sedert 1995 sluit in Cliché, Agter die swart gordyn en Lewensreis van ’n vreemdeling, waarin hy meermale self optree en van sy eie komposisies sing.

Publikasies

Jaar	Publikasies
1983	Lewende water
1999	Metronoom
2000	Metronoom II
2001	Metronoom III

Bronnelys

• Van Coller, H.P. (red.) “Perspektief en Profiel Deel 3” Van Schaik-Uitgewers Pretoria Eerste uitgawe  2006
• Prins, Gavin “Teoloog kry reuse-hartaanval” Rapport 26 September 2010
• Esat: http://esat.sun.ac.za/index.php/Terblanche_Jordaan
• LinkedIn: https://za.linkedin.com/in/terblanche-jordaan-0913095^{[dooie skakel]}

Eksterne skakels

• Terblanche Jordaan op Twitter
• Terblanche Jordaan op Facebook