Three Mile Island

Three Mile Island is 'n kernkragsentrale in Harrisburg, Pennsilvanië in die Verenigde State van Amerika. Die sentrale lê op 'n eiland in die Susquehanna-rivier en beskik oor twee drukwaterreaktors genaamd TMI-1 en TMI-2. Op 28 Maart 1979 het Amerika se ernstigste siviele kernongeluk hier plaasgevind. Reaktor TMI-2 se verkoelingstelsel het gefaal wat tot 'n gedeeltelike smelting van die reaktor gelei het en 'n aansienlike hoeveelheid straling in die atmosfeer vrygestel het.

Three Mile Island

Kernongeluk

'n Grafiese voorstelling van die uiteindelike situasie in die reaktor.

Die voorval van 28 Maart 1979 begin met 'n betreklik geringe storing in die sentrale se sekondêre verkoelingstelsel. Die storing veroorsaak dat die temperatuur in die primêre koelwater begin styg. Die reaktor het, soos verwag, homself outomaties afgeskakel. Dit het alles in ongeveer 'n sekonde gebeur.

As 'n reaktor afgeskakel word, stop die kernreaksie en kernsplyting vind nie meer plaas nie. Die produksie van hitte word grotendeels gestop, maar 'n afgeskakelde reaktor produseer (as gevolg van die radioaktiewe materiaal se vervalprosesse) steeds hitte wat gedreineer moet word.

Die Three Mile Island-kernsentrale

In Three Mile Island begin die druk in die primêre verkoelingstelsel op te bou, wat veroorsaak dat 'n veiligheidsklep oopgaan om die druk te verlaag. Die klep het egter nie weer dig gesluit nadat die druk voldoende verlig is nie. As gevolg van die sentrale se ontwerp kon die operateurs nie die probleem op hulle kontrolepaneel sien nie, en was hulle nie daarvan bewus nie. 'n Groot deel van die primêre koelmiddel het so verlore gegaan en stoomballe het in die reaktor se pype ontstaan. Dit veroorsaak dat die reaktor nie meer voldoende afgekoel kon word nie en die temperatuur het bly styg. In die proses is die reaktor ernstig beskadig en is radioaktiewe gasse in die atmosfeer vrygestel.

Die operateurs in die kontrolekamer was nie in staat om die situasie waar te neem en daarop te reageer nie. Tydens die ondersoek is bevind dat onvoldoende instrumentasie en weinig opleiding oor hoe om noodsituasies te hanteer vir die ongeluk verantwoordelik was.

Reaktors

Reaktor	Tipe	Netto vermoë	Brutto vermoë	Bouwerk begin	Inbedryfgestel	Kommersiële lewering	Afgeskakel
Three Mile Island-1	Drukwaterreaktor	786 MW	837 MW	18-05-1968	19 Junie 1974	2 September 1974	(beplan vir 2034)
Three Mile Island-2	Drukwaterreaktor	880 MW	959 MW	1-11-1969	12 April 1978	30 Desember 1978	28 Maart 1979 (reaktor vernietig)

Heropening van TMI-1

'n 20-jaar kragaankopekontrak tussen Constellation Energy en Microsoft is op 20 September 2024 aangekondig wat TMI-1, wat nie in die kernongeluk betrokke was nie, maar sedert 2019 nie in gebruik is nie, weer sal begin gebruik om koolstofvrye krag op te wek vir die maatskappy se tegnologiedatasentrums wat kunsmatige intelligensie ondersteun. Daar word verwag dat die kernkragsentrale teen 2028 weer operasioneel sal wees.

Eksterne skakels

• Wikimedia Commons het meer media in die kategorie Three Mile Island.