Tony Buzan

Tony Buzan (* 2 Junie 1942 - ) is 'n Britse sielkundige en outeur. Hy is veral bekend vir sy werk om die breinkaart te populariseer.

Tony Buzan
Geboortenaam	Anthony Peter Buzan
Gebore	2 Junie 1942 Palmers Green, Middlesex
Nasionaliteit	Verenigde Koninkryk
Vakgebied	Sielkunde
Alma mater	Universiteit van British Columbia
Webblad	www.thinkbuzan.com

Lewensloop en skryfwerk

Hy is gebore in Londen en behaal in 1964 aan die Universiteit van British Columbia onderskeidinge in sielkunde, Engels, wiskunde, en wetenskap.

Hy is veral bekend vir sy boek Make the Most of Your Mind, sy bevordering van geheuebrugstelsels en sy breinkaart tegnieke.

In opvolg van die 1970's-reeks wat hy vir die BBC aangebied het, het hy baie van sy idees verwoord in 'n reeks van vyf boeke: Use Your Memory, Master Your Memory, Use Your Head, The Speed Reading Book en The Mind Map Book.

Hy is president van die Breinstigting, die stigter van die Breintrustliefdadigheidgenootskap, die Wêreldgeheuekampioenskappe en die Wêreldbreinkampioenskappe. Barry Buzan, Professor in die internasionale politiek aan die London School of Economics, is Tony se broer.

Evaluasie van sy werk

Buzan is 'n voorstander en verdediger van 'n aantal kontroversiële onderwerpe soos geestelike geletterdheid (mental literacy), spirituele intelligensie, sensuele intelligensie, sinchronisasie van die linker- en regterhelfte van die brein en intellektuele oorvloed. Hy staan ook bekend as die "breinkaart-ghoeroe", en kan weens die gewildheid van sy idees en boeke op 'n hele aantal volgelinge wêreldwyd reken. Buzan beweer dat die breikaartidee geïnspireer is deur die algemene betekenisleer in wetenskapsfiksiewerke van veral A. E. van Vogt en L. Ron Hubbard. Breinkaarte (en soortgelyke begrippe) is egter al lank voor Buzan se werk in gebruik vir die doeleindes van leer, dinkskrums, geheuehulpmiddels, visuele denke en probleemoplossing deur 'n verskeidenheid van professionele individue. Dr. Allan Collins word algemeen as die "vader van die moderne breinkaart" beskou.

Ander populêre sielkunde onderwerpe waaroor hy skryf sluit in geniekwosiënt (GK), geheue, kreatiwiteit en spoedlees. Tony Buzan het verskeie dokumentêre programme aangebied of in opgetree. Hy het ook in sowel televisie as radio gesprekprogramme opgetree. Hy het as konsultant vir regeringsdepartemente en multi-nasionale maatskappye, insluitende Hewlett Packard, Arthur Anderson, Fluor Daniel, Goldman Sachs, IBM, BP, Barclays International en EDS opgetree. Buzan is 'n gereelde gasdosent aan verskeie internasionale universiteite en besigheidskole.