Trawal
Trawal is ‘n nedersetting en landbougebied aan die Weskus van Suid-Afrika, veral bekend vir sy wynkelder.[1]
Dit lê op die oewer van die Olifantsrivier, 15 km suid van Klawer, 267 km noord van Kaapstad, langs die N7-nasionale pad van Kaapstad na Windhoek en die spoorlyn van Graafwater na Vredendal en Bitterfontein, in ‘n vallei wat gevorm word met die Nardouwsberg en die Gifbergpas aan die oostekant en Skurfkop aan die weste. Die gebied is ‘n 50 m bo seevlak en lê by 31° 53' suid en 18° 38' oos.
Daar word geboer met wyn- en tafeldruiwe en daar is verskeie koelkamers, klein winkels, ‘n vulstasie en ‘n laerskool. In die lente lok die veld besoekers na die veldblomme. ‘n Kanaal uit die Bulshoekdam verskaf water.
Trawal het ook 'n bekende familie begraafplaas (31°52'48.9"S 18°38'13.0"E) waar talle grafte van die Coetzee, Visser, Le Grange en Brand families is.
Die naam Trawal dateer uit die tyd toe Jan van Riebeeck ‘n ekspedisie na die gebied gestuur het. Later het Simon van der Stel met sy tog dieselfde probleme ondervind om die Olifantsrivier hier oor te steek. Trawal is ‘n outydse Afrikaanse woord ontleen aan Portugees met die betekenis van “’n groot moeilikheid”.