Tremloods, Pretoria

Die Tremloods (Engels: Tram Shed) in Pretoria is 'n historiese gebou geleë op die hoek van Van der Walt- en Schoemanstrate (nou Lilian Ngoyi en Francis Baardstrate) in die middestad van Pretoria. Dit is in 1912 opgerig en is gebou uit rooi Kirkness-stene.

Soos die naam aandui is dit oorspronklik gebruik as 'n loods (stoorplek) vir Pretoria se munisipale trems ('n bustipe-vervoermiddel met staalwiele, daterend uit die vorige eeu). Daarna het die tremloods as 'n busdepot gedien, en toe die depot na Pretoria se westekant verskuif is, by Prinsepark, het dit die elektrisiteitsafdeling van die Stadsraad van Pretoria gehuisves. Die gebou is in die laat 1980's heeltemal gerestoureer en in 'n moderne winkelsentrum omskep, maar met behoud van die antieke struktuur van die rooi Kirkness-stene, die atmosfeer en natuurlik die naam.