TuksVillage

TuksVillage is in 2008 gestig ná omvattende navorsing deur die Universiteit van Pretoria gedoen is wat die akkomodasiebehoeftes van studente ondersoek het. Dit het daarnatoe gelei dat TuksVillage in verskeie opsigte uniek is. Die uitleg van die geboue en die kultuur binne die koshuis verskil baie van die meer tradisionele koshuise van die universiteit. TuksVillage is primêr 'n akademiese koshuis en neem nie deel aan tradisionele koshuisaktiwiteite soos jool en ienkmelodienk nie. Daar is 7 woonstelblokke met name van Blok A tot Blok J, waar Blok F slegs vir nagraadse studente is, asook 'n hoofgebou met 'n saal en ander geriewe.

TuksVillage
Leuse in Afrikaans:	Dis hier waar ons bly!
Leuse in Engels:	Here we live!
Gestig:	2008
Studentetal:	448
Ligging:	Pretoria, Gauteng, Suid Afrika
Webtuiste:	www.up.ac.za/tuksvillage

Die hoofgebou van TuksVillage wat die winkel en die saal toon.

Ligging

TuksVillage is geleë in Pretoria, op die LC de Villiers-sportkampus ongeveer 1,5 km van die Hatfieldkampus van die universiteit. Die koshuis is binne loopafstand van 'n winkelsentrum waar enige benodigdhede, ook kos, gekoop kan word.

Plasings

Voornemende eerstejaarstudente doen aansoek vir koshuisplasing tydens hul aanvanklike registrasie by die universiteit, en plasing word op grond van hul graad 11-punte gedoen. Die universiteit sal voor die student se studies begin, die student in kennis stel of hy/sy aanvaar is, en indien nie, word alternatiewe koshuise voorgestel.

Vir daaropvolgende studiejare word kamers toegeken op grond van die student se punte aan die einde van die eerste semester. Plasings word gewoonlik bekend gemaak aan die begin van die vierde kwartaal.

Verwelkomingsweek

Eerstejaarstudente word versoek om 'n week voor die universiteit amptelik open in hul kamers in te trek. Tydens hierdie week sal die bestuur van die koshuis belangrike inligting rakende die koshuislewe aan nuwe studente deurgee en verskeie spanbouaktiwiteite word deur die inwoners gehou. Dit neem gewoonlik die vorm van kompetisies tussen die studente van die onderskeie blokke aan.

Woonstelblokke A, B en C met die grasperk voor die koshuis se hoofgebou.

Geriewe

Elke blok bestaan uit 4 vloere met twee eenhede per vloer waar van een vir mans en een vir dames is. Die eenhede bevat agt kamers met 'n gemeenskaplike kombuis en badkamer. Elke kamer word ook voorsien van 'n breëbandinternetkonneksie wat die Universiteit van Pretoria sonder enige koste verskaf.

Die koshuis het 'n hoofgebou wat bestaan uit 'n saal, waar 'n verskeidenheid van funksies plaasvind, asook 'n studiesentrum, ontspanningsarea, rekenaarlaboratorium, wassery en winkel. 'n Draadlose internetverbinding is rondom die hoofgebou beskikbaar maar nie in die afsonderlike blokke nie.