Ur-Zababa

Ur-Zababa word in die Sumeriese koningslys genoem as die tweede koning van die 4de dinastie van Kisj. Volgens dié teks het Ur-Zababa vir Sargon van Akkad as sy skinker aangestel. Sargon was later die heerser van die Akkadiese Ryk.

Sumeriese legende

Die Sumeriese Sargonlegende bevat 'n legendariese weergawe van Sargon se magsopkoms. Dit is 'n ouer weergawe van die voorheen bekende Assiriese legende wat in 1974 by Nippur ontdek en in 1983 die eerste keer geredigeer is.^[1]

Die fragmente is onvolledig, maar dié wat bewaar gebly het, noem La'ibum as Sargon se vader. Ná 'n gaping spring die teks na Ur-Zababa, wat ná 'n droom wakker word; die inhoud van die droom word nie in die oorblywende deel van die tablet onthul nie. Om onbekende redes stel Ur-Zababa vir Sargon as sy skinker aan. Kort hierna nooi die koning Sargon na sy kamers om met hom sy droom te bespreek. Die droom gaan oor die godin Inanna wat Ur-Zababa in 'n rivier van bloed verdrink.^[2] Ur-Zababa is baie bang en gee opdrag dat Sargon vermoor word deur Beliš-tikal, die hoofsmit. Inanna verhoed dit en beveel Sargon om by die poorte te stop omdat hy "met bloed besmet is". Toe Sargon na Ur-Zababa terugkeer, word die koning weer bang en besluit hy om Sargon na koning Lugal-zage-si van Uruk te stuur met 'n boodskap op 'n kleitablet waarin dié gevra word om Sargon te vermoor.^[3] Die legende eindig hier; in die res van die teks word waarskynlik beskryf hoe Sargon koning geword het.^[4]

Ander bronne

Die Weidnerkroniek (ABC 19) stem saam dat Sargon die skinker van Ur-Zababa was. Die meeste afskrifte van die Sumeriese koningslys noem Ur-Zababa het 'n onrealistiese bewindstydperk van 400 jaar gehad, maar een afskrif gee ses jaar aan en word as geloofwaardiger beskou.

Dit is bekend dat Lugal-zage-si van Uruk en Umma Kisj teen die einde van sy bewind verwoes het, voordat hy self deur Sargon afgesit is. Daar word gewoonlik aangeneem dat Sargon ook 'n rol gespeel het in Ur-Zababa se nederlaag, maar die teks in dié verband is te fragmentaries om duidelik te wees.

Ur-Zababa se opvolgers word in die koningslys genoem en begin met Zimudar; dit lyk of hulle vasals van Sargon was en daar is geen bewyse dat hulle ooit alleenheerskappy in Sumer toegepas het nie.^[5]

Verwysings

↑ Cooper, J.S., en Heimpel, W., "The Sumerian Sargon Legend", Journal of the American Oriental Society 103 (1983), 67–82. Joan Goodnick Westenholz, Legends of the Kings of Akkade: The Texts (1997), p. 12.
↑ "Sargon and Ur-Zababa". ETCSL.
↑ "The Sargon Legend." The Electronic Text Corpus of Sumerian Literature. Oxford University, 2006
↑ Cooper & Heimpel 1983: 67–82
↑ Kish at The History Files

Skakels

Hierdie artikel is in sy geheel of gedeeltelik uit die Engelse Wikipedia vertaal.

[1] Cooper, J.S., en Heimpel, W., "The Sumerian Sargon Legend", Journal of the American Oriental Society 103 (1983), 67–82. Joan Goodnick Westenholz, Legends of the Kings of Akkade: The Texts (1997), p. 12.

[2] "Sargon and Ur-Zababa". ETCSL.

[3] "The Sargon Legend." The Electronic Text Corpus of Sumerian Literature. Oxford University, 2006

[4] Cooper & Heimpel 1983: 67–82

[5] Kish at The History Files

[1]

[2]

[3]

[4]

[5]