Utahmeer

Die Utahmeer (Engels: Utah Lake) is 'n vlak varswatermeer (met 'n maksimale diepte van tien voet) in die sentrale gedeelte van Utah County, 'n administratiewe distrik van die Amerikaanse deelstaat Utah. Dit is wes van Provo en 48 myl suid van Salt Lake City in die Utah Valley geleë waar dit deur die metropolitaanse gebied van Provo-Orem omring word. Sy enigste natuurlike uitvloei is die Jordanrivier wat noordwaarts deur die Soutmeervallei vloei om in die Groot Soutmeer uit te mond. Net soos die Groot Soutmeer is ook die Utahmeer 'n klein oorblyfsel van die magtige Lake Bonneville en het sedert sy ontstaan steeds 'n varswatermeer gebly. Dit word gevoed deur bergstroompies.

Utah Lake State Park: Uitsig oor die Utahmeer in Desember. Dikwels bevries die meer laat in Desember

Utahmeer in die Novemberson

Pleasant Grove, een van die nedersettings langs die meer se oewers

Uitsig oor die Utahmeer vanuit Squaw Mountain, terwyl 'n somerbui in die verte uitsak

Die Utahmeer is die derde grootste meer in Utah en die deelstaat se grootste varswatermeer met 'n oppervlakte van 150 vierkante myl. Die meer is 'n gewilde bestemming vir watersport-geesdriftiges en hengelaars. Daar is boothawens in Provo, Saratoga Springs, American Fork en Lindon sowel as ’n strand en kampeerplek. Vir fietsryers is daar 'n fietspad rondom die meer met 'n lengte van 100 myl, die Utah Lake Loop. Die roete loop deur plat terrein en bied aan die weskant van die meer uitsigte oor die Wasatch Front-bergreeks.

Eksterne skakels

Toerisme

---

• Utah.com: Utah Lake State Park
• Utah Lake Commission: Utah Lake State Park Geargiveer 13 November 2018 op Wayback Machine

Navorsing

---

• BYU University Communications News, 1 Augustus 2019: BYU researchers dig up ways to improve Utah Lake

Bootsport

---

• Utah.com: Utah Lake Boating