Vank

Die Vank (Armeens: Սուրբ Ամենափրկիչ Վանք, Surp Amenaprgich Vank; Persies: کلیسای وانک of آمنا پرکیج, Kelisa-ye Vank of Amenapergich), of Vank-katedraal, is 'n Armeens-Apostoliese kerk in Isfahan, Iran. Vank beteken klooster in Armeens. Die katedraal heet amptelik die Heilige Verlosser-katedraal. Dit is aan die begin van die 17de eeu gebou.

Die Vank
Die Vank
Denominasie	Armeens-Apostoliese Kerk
Adres	Isfahan, Iran

Agtergrond

Die ou hoofstad was Tabriz, in die noordweste van die Persiese Ryk. Sjah Abbas I die Grote was bang dat deel van sy ryk deur die Ottomaanse Ryk verower sou word, wat inderdaad later gebeur het. Hy het dus sy hoofstad na Isfahan verskuif. In 1604 het hy ook 3 000 Armeense gesinne uit die stad Julfa na Isfahan verskuif. Julfa lê nou in die Aserbeidjanse eksklawe Nachitsjevan.

Abbas I het dit ook gedoen om die handel in sy nuwe hoofstad te bevorder, veral om die syhandel te bly monitor. Hy het 'n nuwe distrik, Nieu-Julfa, gebou en die inwoners in staat gestel om hul eie kerke te bou. In 1606 bou Nieu-Julfa sy eerste katedraal, wat tussen 1655 en 1664 vervang is deur die huidige gebou.

Tot op hede word die kerk steeds vir godsdiens gebruik. In die altaar lê glo die oorblyfsels van die heilige Josef van Arimathea.

Benewens hierdie katedraal is daar nog 12 Armeense kerke in Isfahan. Enkele van hierdie kerke is die Betlehem-kerk, die Kerk van Maria en die Kerk van Sint Joris.

Langs die katedraal is 'n museum waar verskillende voorwerpe uit die geskiedenis van Armeniërs in Isfahan bewaar word, waaronder die eerste gedrukte Armeense Bybel, wat in 1665 in Amsterdam gedruk is.