Venterskroon

Venterskroon
Venterskroon
	Die grondpad deur Venterskroon
	Venterskroon
	Koördinate: 26°52′29″S 27°17′55″O / 26.87472°S 27.29861°OKoördinate: 26°52′29″S 27°17′55″O / 26.87472°S 27.29861°O
Land	Suid-Afrika
Provinsie	Noordwes
Distriksmunisipaliteit	Dr. Kenneth Kaunda
Plaaslike Munisipaliteit	JB Marks
Tydsone	UTC+2 (SAST)

Venterskroon is 'n nedersetting in die Noordwesprovinsie, Suid-Afrika in die gebied van die Vredefortkoepel. Die jaarlikse Crater Cruise-bergfietswedren gaan deur Venterskroon.

Geskiedenis wysig

Die dorp is gedurende 1887 geproklameer nadat daar goud in 1880 ontdek is en delwers begin het om die goud te ontgin. Die delwers het vanaf 1880 tot 1913 in die omgewing gemyn en weer later vanaf 1930 tot 1937. Sowat 140 kg goud is hier ontgin. Die goudrif was nie so winsgewend soos dié aan die Witwatersrand nie.

Soos wat maar die geval in delwersdorpe was, was die Imperial Inn een van die eerste geboue op Venterskroon. Later het die polisiestasie en tronk gevolg. Daar was 'n huis vir die mynkommissaris en die skoolmeester. Al drie hierdie geboue is vandag nog te sien in die dorpie met sy een stofstraat.

Venterskroon spog met 'n kerkgebou, maar sedert 2014 nie meer 'n gemeente nie. Dit was 'n gemeente van die Nederduitsch Hervormde Kerk van Afrika en is gestig op 7 Julie 1888. Daar is gereeld twee keer per maand 'n oggenddiens gehou. Die gemeente het in 2000 33 belydende en sewe dooplidmate gehad en in die jaar toe dit ontbind het, 35 en twee. Die kerkgebou is net agter die polisiestasie en die tronk.

Wêrelderfnisgebied wysig

Die gebied wat Venterskroon insluit is in 2005 deur UNESCO as 'n wêrelderfenisgebied verklaar.^[1] 'n Memorandum van verstandhouding tussen die SA-regering en die Vredefortkoepel is op 27 Mei 2012 deur die Minister van Omgewingsake, me Edna Molewe, onderteken. Dit baan die weg vir wetgewing sodat die wêrelderfnisgebied bewaar kan bly.