Verklikker (roman)

Verklikker is 'n gruwel-spanningsroman geskryf deur Leon van Nierop. Die verhaal speel in Namibië af, neffens 'n treinspoor tussen Swakopmund en Windhoek. Die verhaal strek oor minder as drie jaar.

Verklikker Soms lê die antwoord in die donker dimensie waar leuens en waarheid ontmoet
Skrywer	Leon van Nierop
Omslagontwerper	Doghouse Creative
Land	Suid-Afrika
Taal	Afrikaans
Genre	Spanningsroman
Uitgewer	LAPA
Uitgegee	2011
Bladsye	393
ISBN	978-0-7993-4957-3
Letterkunde-portaal

Intrige

Die 16-jarige Marco Lange verloor sy skeiende ouers, Martin en Sylvia Lange, deur twee afsonderlike selfmoorde. Sy pa het na bewering die bakkie, wat hy aan Martin bemaak het, op die treinspoor getrek en in 'n botsing met 'n aankomende passasierstrein gesterf. Sy ma het van die boonste verdieping na benede getuimel en op die klavier gesterf. Hierdie treurspel word toegeskryf aan 'n skoolkys wat afgemat geraak het; nie een sou egter 'n skeisaak kon oorleef nie.

Kort daarna neem die narsistiese Ludwig Benouw oor, die aangestelde plaasvoorman, begin met 'n ysterhand regeer en probeer sy onoorspronklike stempeltjie op alles en almal afdruk. Marco word deur die testament onder Benouw se voogdyskap geplaas en kan eers werklik die plaas, Ewenaarskloof, ná sy mondigwording (18) erf. Die tradisionele en eenvoudige beesplaas word sonder toestemming omgeskakel na 'n kliniesskoon, moderne en hiperkorrekte gasteplaas. Die treinwrak word opgeknap om as toertrein te dien. Marco word hiet en gebied, geboelie en uiteindelik na die bywonershuisie uitgesmyt. Marco merk by die treinwrak onverklaarbare verskynsels op; heldersiendheid is 'n gawe wat hy oorgeërf het. Dit bring geleidelik brokkies inligting na vore.

Luitenant Sagrys Botha, wat by 'n ringdiefstal skoolleerders moet poligrafeer, toon 'n toegeneentheid teenoor Marco wat ook 'n speurder wil word. Sagrys maan Marco om Ludwig se vertroue te wen deur samewerking en geveinsde onderdanigheid. Daar lê 'n grysgebied tussen leuens en waarheid, geen absoluuthede nie. Party mense ken slegs hul eie waarhede en vind die ware waarheid as leuens.

'n Wending in die verhaal kom minder as twee jaar later, wanneer die afgetrede huishoudster, Mavis van Tonder, op die nooiensreis van die Benouw Express vermoor word. Martin word op die moordtoneel deur die ander passasiers betrap en in die beskuldigdebank geplaas. Die matriekeindeksamen, 'n teleurstellende verhouding met sy intieme skoolvriendin, Lucinda Viljee, ontheffing van hoofseunskap, die plaas wat op die spel is, geregsdienaars wat net bevordering voor oë het en die onversadigbare pers en sosiale media plaas ekstra druk op hom.

Gewapen met al die versamelde inligting begin Sagrys grawe in Ludwig se verlede, wat verrassende gevolge oplewer. Veral wanneer Ludwig se suster, Hedwig, en 'n oorlewende van die botsing, Ernst Duvenhage, gekontak word.