Wystan Hugh Auden (gebore op 21 Februarie 1907 – oorlede op 29 September 1973) was 'n Engelse digter.

W. H. Auden
Auden in 1939
Gebore
Wystan Hugh Auden

21 Februarie 1907
Sterf29 September 1973 (op 66)
NasionaliteitVlag van Verenigde Koninkryk Verenigde Koninkryk (vanaf geboorte)
Vlag van Verenigde State van Amerika Verenigde State (sedert 1946)
BeroepDigter
EggenootErika Mann (onvervulde huwelik, 1935, om haar met 'n Britse paspoort te voorsien)
Ouer(s)George Augustus Auden (vader)
Constance Rosalie Bicknell Auden (moeder)
GeloofAnglikaans

W.H. Auden was een van Engeland se bekendste moderne digters. Hy was die leier van 'n groep digters in die dertigerjare wat as die Geslag van Dertig bekend gestaan het en wat onder andere Stephen Spender, Cecil Day Lewis en Louis MacNeice ingesluit het. In hul gedigte het hulle die gevolge van die sosiale en ekonomiese depressie weerspieël. Nadat hy hom in 1939 in die VSA gevestig het, het Auden se poësie 'n verandering ondergaan. Hy het meer gekonsentreer op Christelike etiek en die morele dilemmas van die mens in die samelewing as op politiek. Afgesien van sy gedigte het Auden ook 'n aantal toneelstukke (meestal in same werking met Christopher Isherwood), literêre kritiek en enkele opera-libretti geskryf.

Wystan Hugh Auden is op 21 Februarie 1907 in York, Engeland, gebore. Sy vader was 'n dokter wat in die letterkunde belang gestel het en sy moeder was 'n baie godsdienstige vrou. In Auden se eie woorde was sy ouers "Anglikaanse boekliefhebbers". In 1908 het die gesin na Birmingham verhuis, waar Auden later die gevolge van die ekonomiese krisisjare van naderby sou sien.

Tydens sy studiejare (1925-1928) aan Christ Church College, Oxford, het Auden veral belangstelling in Ou-Engelse en Middel-Engelse letterkunde getoon. Sy eerste gedigte is in 1928 deur sy vriend en mededigter, Stephen Spender, privaat uitgegee. Hy het eers in 1930 begin naam maak met sy bundel Poems, en later met The orators, (1932). Auden was in daardie jare sterk onder die invloed van Freud en Marx. Hy is beskou as die leier van 'n groep linkse digters wat dikwels die Auden-groep of die Geslag van Dertig:genoem is. Die groep het onder andere Stephen Spender, Cecil Day Lewis en Louis MacNeice ingesluit. Die sosiale ellende, wat die gevolg was van die ekonomiese depressie van die vroeë dertigerjare, word veral in Auden se gedigte sterk uitgebeeld. As simboliese agtergrond het hy landskappe wat deur nywerhede geskend is en die besoedelde stede van Wes-Europa en Amerika gebruik.

In 1935 is Auden met Thomas Mann se dogter Erika getroud. Die volgende jaar vertrek hy na Spanje om, soos baie ander skrywers en digters van dié tyd , aan die Republikeine se kant in die Spaanse Burgeroorlog te veg. Sy gedig "Spain" (1937) is op hierdie ondervindings gebaseer. In dieselfde jaar verskyn Letters from lceland en Letters to Lord Byron. Journey to a war (1939) is 'n verslag van die besoek wat Auden tydens die Chino-Japanse oorlog saam met Isherwood aan China gebring het. Hy het 'n wyer publiek probeer bereik deur 'n aantal toneelstukke, onder andere The dog beneath the skin (1935) en On the frontier, in samewerking met Isherwood te skryf. Die stukke staan sterk onder die invloed van Brecht.

In 1939 emigreer Auden na die VSA en aanvaar Amerikaanse burgerskap in 1946. Tussen 1941 en 1948 skryf hy vier lang gedigte: "New Year letter", "The sea and the mirror", "For the time being" en "The age of anxiety". Vir laasgenoemde ontvang hy die Pulitzerprys in 1948. Die invloed van Freud en Marx het nou plek gemaak vir dié van die twee Christelike denkers Kierkegaard en Niebuhr, en Auden se gedigte sedert die veertigerjare is sterk godsdienstig. In sy werk word die morele dilemma van die mens en die soeke na die sin van die lewe uitgebeeld. Auden se ander werk sluit ook in twee bundels liriese gedigte Look stranger! (1936) en Another time (1940). en ander bundels soos The shield of Aehilles, Homage to Clio, About the house en City without walls. The enchafed blood (1951) en The dyer's hands (1962) bevat literêre kritiek, waaronder essays oor Kafka, Rilke, James en Yeats. Tussen 1956 en 1961 was hy professor van poësie aan Oxford. Hy is op 29 September 1973 onverwags in Wene oorlede.

Auden het aan die Gresham's Skool en aan die Universiteit van Oxford gestudeer.

Bibliografie wysig

  • Poems (1928)
  • Poems (1930)
  • The Orators: An English Study (1932)
  • The Dance of Death (1933)
  • Poems (1934)
  • The Dog Beneath the Skin (1935)
  • The Ascent of F6 (1936)
  • Look, Stranger! (1936)
  • Spain (1937)
  • Letters from Iceland (1937)
  • On the Frontier (1938)
  • Journey to a War (1939)
  • Another Time (1940)
  • The Double Man (1941)
  • For the Time Being (1944)
  • The Collected Poetry of W.H. Auden (1945)
  • The Age of Anxiety: A Baroque Eclogue (1947)
  • The Enchafèd Flood (1950)
  • Collected Shorter Poems, 1930-1944 (1950)
  • Nones (1951)
  • The Shield of Achilles (1955)
  • Homage to Clio (1960)
  • The Dyer's Hand (1962)
  • About the House (1965)
  • Collected Shorter Poems 1927-1957 (1966)
  • Secondary Worlds (1967)
  • Collected Longer Poems (1969)
  • City Without Walls and Other Poems (1969)
  • A Certain World: A Commonplace Book (1970)
  • Academic Graffiti (poems)
  • Epistle to a Godson and Other Poems (1972)
  • Forewords and Afterwords (1973)
  • Thank You, Fog: Last Poems (1974)

Bronnelys wysig