Kaapse grondeekhoring

Die Kaapse grondeekhoring of bloot grondeekhoring (Xerus inauris) (soms verkeerdelik 'n waaierstertmeerkat genoem – dis glad nie 'n meerkat nie – en voorheen ook waaiersterteekhoring genoem) kom in die droë streke van Suider-Afrika voor. Hulle lewe in gate in die grond wat hulle self grawe en wat gemiddeld 700 m² beslaan en 2 tot 100 ingange kan hê. Hulle deel hulle gate dikwels met stokstertmeerkatte en witkwasmuishonde.

Kaapse grondeekhoring
Drie grondeekhorings bespied die omgewing naby Solitaire in die Namibwoestyn, Namibië.
Bewaringstatus
Veilig  (IUCN 3.1)
Wetenskaplike klassifikasie
Koninkryk:	Animalia
Filum:	Chordata
Klas:	Mammalia
Orde:	Rodentia
Familie:	Sciuridae
Genus:	Xerus
Subgenus:	Geosciurus
Spesie:	X. inauris
Binomiale naam
Xerus inauris (Zimmerman, 1780)
Verspreiding

Twee grondeekhorings naby Solitaire in die Namibwoestyn, Namibië

Dieet en afmetings

Hulle vreet hoofsaaklik plante en sade en sal ook wortels en bolle onder die grond uitgrawe. Hulle drink nie water nie en kry al hulle vog uit hulle voedsel. Volwasse grondeekhorings het 'n gemiddelde lengte van 45 cm, met die mannetjies effens langer (424–476 mm) en swaarder (423–649 g) as die wyfies (435–446 mm en 444–600 g). 

Lewensloop en gewoontes

Hulle lewe in groepe van 2–3 volwasse wyfies en 'n maksimum van nege onvolwassenes van albei geslagte asook die wyfies se afhanklike nageslag. Een tot drie kleintjies word gebore. So 'n groep beset gewoonlik 'n gebied van sowat 4 hektaar. Groepe met meer as drie wyfies verdeel in kleiner groepe. Volwasse mannetjies leef afsonderlik en kom net by die wyfies as dié op hitte is. Mannetjies kan as tot soveel as 19 onverwante individue saamleef en grootte en lede van die groepe verander gedurig. Grondeekhorings het 'n moontlike lewensduur van tot 15 jaar.

Sien ook

• Lys van Suider-Afrikaanse soogdiere
• Lys van Suider-Afrikaanse soogdiere volgens wetenskaplike name
• Suider-Afrikaanse soogdiere en hul ordes

Bronnelys

• Griffin, M. & Coetzee, N. (2008). Xerus inauris. 2008 IUBN Rooi Lys van bedreigde spesies. Internasionale Unie vir die Bewaring van die Natuur 2008. Verkry op 8 Januarie 2009.
• Soogdiere van die Krugerwildtuin en ander Nasionale Parke (1979). Saamgestel deur Die Nasionale Parkeraad. 'n Publikasie van die Raad van Kuratore vir Nasionale Parke van die Republiek van Suid-Afrika. ISBN 0-86953-027-5.

Eksterne skakels

• Wikimedia Commons het meer media in die kategorie Kaapse grondeekhoring.

• Wikispecies het meer inligting verwant aan Kaapse grondeekhoring