Washington's Birthday
Washington's Birthday is 'n openbare vakansiedag wat in die Verenigde State van Amerika op die derde Maandag in Februarie gevier word. Dit staan ook algemeen bekend as Presidents Day (alternatiewe spelwyses is Presidents' Day of President's Day). Washington's Day of Presidents Day is daarnaas ook die amptelike naam van 'n openbare vakansiedag in 'n groot aantal deelstate wat met die federale vakansiedag saamval.
Geskiedenis wysig
Onder die naam Washington's Birthday is die federale openbare vakansiedag in 1880 deur die Amerikaanse Kongres ingevoer en aanvanklik in regeringskantore in die District of Columbia gevier. Vyf jaar later is dit landswyd in alle federale kantore waargeneem.
Die vakansiedag was die eerste op federale vlak waarmee 'n Amerikaanse burger vereer is en is op president George Washington se verjaardag (22 Februarie) gevier. Op 1 Januarie 1971 is die federale vakansiedag volgens die Uniform Monday Holiday Act na die derde Maandag in Februarie verskuif. Sodoende val dit op 'n datum tussen 15 en 21 Februarie, en sy naam het misleidend geword aangesien dit nooit meer op Washington se werklike verjaardag 22 Februarie sal val nie.
'n Wetsontwerp vir die Uniform Holidays Bill van 1968 het voorsiening vir 'n naamwysiging gemaak - die vakansiedag sou voortaan as Presidents' Day bekend gestaan het om die verjaardae van sowel George Washington asook Abraham Lincoln te vier. Die voorstel is egter op komiteevlak verwerp. Die wet, wat uiteindelik goedkeur en op 28 Junie 1968 in werking gestel is, het die naam Washington's Birthday behou.