Wienerdag

Wienerdag was 'n openbare vakansiedag in die Kaapkolonie en tot in 1952 in die Unie van Suid-Afrika.

Hierdie vakansiedag was elke jaar gevier op die eerste Maandag in Oktober sedert die aanvaarding van Wet 34 van 1889 deur die Kaapse parlement. Die dag is gekenmerk deur die plant van bome en sportbeoefening. Later is dit ook soms Boomplantdag en Lentedag genoem. Met Wet 5 van 1952, die Wet op Openbare Vakansiedae, is die vakansiedag afgeskaf.

Ludwig Wiener (* Berlyn, 10 November 1838 - † Nuweland, 12 November 1921) woon as kind in die Verenigde State en kom as 17-jarige na die Kaapkolonie. Van 1855 tot 1870 is hy 'n sakeman in die distrik van Tulbagh. Daarna vestig hy hom in Kaapstad en word in 1883 verkies tot parlementslid vir die stad. Hy lewer 'n groot bydrae tot die bevordering van vryhandel, maar word hoofsaaklik onthou vir die indiening van die wetsontwerp vir die verklaring van die vakansiedag waarvoor hy hom beywer het. Spottend is die dag soms “St. Wiener’s Day” genoem.

Bibliografie

• Green, Lawrence G.: Beyond the city lights – The Story of the Western Province – the Towns and the Farms, the Life and the People, the Folklore and the Legends. Kaapstad: Howard Timmins, 1957