'n Wildplaas is 'n plaas waar oorwegend, indien nie uitsluitlik nie, met wild geboer word. Dit is meermale 'n groot plaas wat tot onlangs vir bees-, skaap- of selfs saaiboerdery gebruik was, maar wat in die huidige ekonomiese klimaat beter presteer vir wildteling.

'n Wildrit op 'n wildplaas.
'n Renosterkalfie op 'n wildplaas in Suid-Afrika.

'n Verdere funksie van 'n wildplaas is as rolspeler in ekotoerisme en natuurbewaring. Die eienaar/ontwikkelaar diversifiseer deur die plaasopstal uit te brei met heelwat gerieflike chalets, en deur moontlik ook 'n paar boskampe en kampeerplekke aan te lê. Dit verskaf 'n verdere bemarkingstema van moderne styl en eksklusiwiteit terwyl die natuurskoon bewaar bly.

Besoekers aan 'n wildplaas word gewoonlik toegelaat om met hul eie of die plaas se voertuie rond te ry om die wild op die plaas te kan besigtig. Die plaas koop gewoonlik op wildveilings verdere wildsoorte aan wat skaars is en lank gelede die plaas bewoon het, maar ondertussen uitgedun of uitgeskiet is. Die voordeel vir die natuur is dat dit die genepoel, wat noodsaaklik is vir suksesvolle voortplanting van hierdie wildsoorte, vergroot of verbeter (sogenaamde "nuwe bloed") wanneer hulle na ander wildplase verskuif word.

Die Transvaalse Bosveld is veral bekend vir sy wildplase, hoewel hulle ook in al die provinsies van Suid-Afrika en Namibië gevind word.

Eksterne skakels wysig