Actv

Actv S.p.A. (Azienda del Consorzio Trasporti Veneziano - "Onderneming van die Venesiaanse Vervoerkonsortium") is 'n munisipale onderneming wat sedert sy stigting in 1978 die openbare vervoernetwerk in die historiese middestad van Venesië en die Venesiaanse strandmeer asook die verbindings met die vasteland bedryf en bestuur. Saam met die stedelike, maatskaplike en ekonomiese ontwikkeling en groei van Venesië, die omliggende eilande en uitgestrekte residensiële en nywerheidsbuurte op die vasteland het Actv sy netwerk voortdurend uitgebrei en aangepas. Actv vervoer daagliks duisende passasiers, Venesiane en besoekers, op waterbus-, trem- en busroetes in Venesië, Chioggia en die Venesiaanse voorstadsones op die vasteland.

Actv S.p.A.
Tipe	Società per azioni (SpA)
Gestig	1978
Hoofkantoor	Venesië, Veneto, Italië
Sleutelpersone	Luca Scalabrin (voorsitter)
Gebied bedien	Stad Venesië, Chioggia
Industrie	Openbare vervoer
Produkte	Waterbus-, veerboot-, bus- en tremdienste
Inkomste	€212,475 miljoen (2012)
Netto inkomste	€17,624 miljoen (2012)
Werknemers	2 731 (2012)
Slagspreuk	«Impresa e territorio, il valore dei fatti»
Webwerf	actv.it

Die onderneming se oorspronge strek terug tot 1881 toe die eerste stoombootroete op die Canal Grande in bedryf gestel is. Verdere mylpale was die vestiging van 'n trolliebusnetwerk in Mestre en die Lido di Venezia, die uitbreiding van waterbus- en veerbootroetes in die Venesiaanse strandmeer, die opening van tremlyne tussen Favaro en Venesië en tussen Marghera en die middestad van Mestre, die elektrifisering van busroetes op die Lido en Pellestrina-eiland en die invoering van voertuie met hibriede aandrywing.

Galery

• 
  'n Actv-waterbus (vaporetto) op Venesië se Canal Grande
• 
  'n Actv-veerboot in die Giudecca-kanaal, op die roete tussen die eilande Tronchetto en Lido di Venezia
• 
  'n Actv-bus in Mestre
• 
  'n Actv-trem op die Piazzale Roma, Venesië, op pad na Favaro op die vasteland

Eksterne skakels

• (en) Die geskiedenis van openbare vervoer in Venesië