Advertensieblokkering

Advertensieblokkering of ad filter is 'n tipe sagteware (of minder algemeen, 'n rekenaarhardewaretoestel), wat advertensieinhoud van 'n webblad, webwerf, of mobiele app kan verwyder of verander. Advertensieblokkers is beskikbaar vir 'n verskeidenheid van rekenaarplatforms, insluitend lessenaar- en skootrekenaars, tabletrekenaars en slimfone. 'n Verskeidenheid van metodes word gebruik vir die blokkering van advertensies. Die voordele wat hierdie sagteware bied is breed en die gebruik van advertensieblokkeringsagteware is aan die toeneem. Daar is egter baie media-eienaars (uitgewers) wat staatmaak op reklame om die "vrye inhoud" wat hulle aan gebruikers bied, te befonds. Sommige het teenmaatreëls begin neem teen gebruikers wat advertensies op die webwerwe wat hulle besoek blok, soos byvoorbeeld Forbes.

Tegnologie en inheemse teenmaatreëls

Aanlynadvertensies bestaan in 'n verskeidenheid van vorms, insluitend webbaniere, foto's, animasies, ingeboude klank en video, teks, of opwipvensters, en kan gebruik maak van klank- en videosnitte wat outomaties speel. Alle webblaaiers bied 'n paar maniere om advertensies te verwyder of te verander: óf deur te fokus op die tegnologie wat gebruik word om advertensies te lewer (soos ingebedde inhoud afgelewer deur inproppe of via HTML5), of te fokus op die URL's wat die bron van advertensies is, of te fokus op gedrag wat kenmerkend is van die advertensies (soos die gebruik van HTML5 outomatiese speel van beide klank en video).

Redes vir die blokkering van advertensies

Uit die oogpunt van internetgebruikers, is daar verskeie fundamentele redes waarom 'n mens sou wou gebruik maak van advertensieblokkering:

• Die beskerming van hul privaatheid
• Om hulself te beskerm teen malware
• Spaar op bandwydte (en geld)
• Beter gebruikerservaring
  • Minder deurmekaar bladsye
  • Vinniger bladsylaaityd
  • Minder afleiding vir gebruiker
• Spaar batterylewe van mobiele toestelle

Uitgewers, aan die ander kant, argumenteer dat internetadvertensies inkomste vir webwerf-eienaars voorsien, wat die webwerfeienaars in staat stel om inhoud vir die webwerf te skep of andersins aan te koop. Uitgewers beweer dat die algemene gebruik van advertensieblokkering-sagteware en -toestelle 'n nadelige invloed op die webwerfeienaarinkomste het, en dus op sy beurt die beskikbaarheid van gratis inhoud op die webwerwe verminder.