Albert Troskie

Prof. Albert Troskie (gebore Adelaide, Oos-Kaap, 1942) is ’n Suid-Afrikaanse orrelis wat gereken word as die land se voorste kenner van dié instrument. As orrelraadgewer het hy vir talle kerke ’n nuwe pyporrel ontwerp en oor die bou daarvan toesig gehou. Hy is ’n vrugbare skrywer, kerk- en konsertorrelis, spreker op binnelandse sowel as buitelandse konferensie, musiek-eksaminator en –beoordelaar, en komponis.

Troskie het in Oos-Kaapland grootgeword en sy skoolloopbaan voltooi aan Gill-kollege op Somerset-Oos. Hy het aan die Universiteite van Kaapstad, Port Elizabeth en Suid-Afrika in musikologie en orrel studeer. Nadat hy in 1968 Unisa se beurs vir orreliste gewen het, het hy twee jaar lank gevorderde onderrig in orrelspel en improvisasie in Nederland ontvang en in musikologie en orrelbou studeer aan die Universiteit van Amsterdam. In 1975 het hy die graad D.Mus. deur Unisa verwerf met ’n verhandeling oor die koormusiek van Max Reger. Hiervoor het hy uitgebreide musikologiese navorsing in Bonn en Wene gedoen.

Hy was dosent aan Unisa en van 1983 tot aftrede in 1999 professor in musiek en musikologie aan die destydse UPE asook hoof van die musiekdepartement.

Hy is reeds amper 50 jaar lank kerkorrelis en koorleier en het die Suider-Afrikaanse Kerkorrelistevereniging (Sakov) op 10 Mei 1980 gestig, waarvan hy 20 jaar lank voorsitter was en redakteur van dié vereniging se nuusbrief asook die jaarblad Vir die Musiekleier. Sakov het in 2002 erelidmaatskap aan hom toegeken.

In 1992 het die uitgewer J.L. van Schaik sy boek Pyporrels in Suid-Afrika uitgegee en in 2010 The Pipe Organ Heritage of South Africa. Met die jare het hy talle artikels oor orrelbou geskryf.

Van die uitsonderlike orrels wat hy ontwerp het, is dié van die NG gemeente Vredefort (1975), die NG gemeente Somerstrand (Port Elizabeth, 1988), waar hy kerkorrelis en koorleier is, en die reusagtige orrel van die Veremarksentrum in die Baai (1999). ’n CD, Grand Organ, is in 2000 uitgereik waarop hy laasgenoemde twee orrels bespeel. Hy het ook ander orrel- en koor-CD’s uitgereik.

Troskie het in die kommissie vir die samestelling van die Afrikaanse Kerke se Liedboek gedien. Hy tree landwyd op as orrelis en spreker en het twee bundels met verwerkings van gewyde liedere vir orrel en koor, Liedboekverwerkings vir Orrel en Koor, Vol. 1 en 2, in onderskeidelik 2003 en 2006 gepubliseer. Van die Oos-Kaapse Kinderkoor is hy reeds etlike die amptelike orrelbegeleier en het drie keer oorsese toere saam met hulle onderneem.

Bron

• (af) Orrel se 40ste jaar gevier Geargiveer 28 November 2017 op Wayback Machine, Netwerk.com, 2 Junie 2015. URL besoek op 28 April 2016.
• (en) Biografiese besonderhede van prof. Troskie op die Oos-Kaapse Kinderkoor se webtuiste Geargiveer 22 September 2017 op Wayback Machine. URL besoek op 28 April 2016.
• (af) Kerk vier orrel-verjaardag met luisterryke uitvoerings, Vaalweekblad, 22 Mei 2015. URL besoek op 28 April 2016.