Alfred Krenz
Alfred Frederic Krenz (1899–1980) was een van die sogenaamde Nuwe Suid-Afrikaanse kunstenaars. Hy was een van ’n aantal Europese kunstenaars wat voor en ná die Tweede Wêreldoorlog na Suid-Afrika geïmmigreer en nuwe idees van die moderne Europese kunsstromings aan die Suid-Afrikaanse publiek bekend gestel het.
| Alfred Krenz | |
|---|---|
| Geboortenaam | Alfred Frederic Krenz |
| Gebore | 1899 Wene, Oostenryk-Hongarye |
| Sterf | 1980 |
| Nasionaliteit | Suid-Afrika |
| Veld | Kuns |
| Opleiding | Kunstgewerbeschule, Weense Akademie vir die Beeldende Kunste |
| Beïnvloed deur | Amédéé Ozenfant |
Alfred Krenz is in Wene, Oostenryk, gebore waar hy sy kunsopleiding tussen 1916 en 1926 ontvang het. Hy het eers 2 jaar opleiding aan die Kunstgewerbeschule ontvang en later 'n verdere 8 jaar opleiding aan die Weense Akademie vir die Beeldende Kunste. In 1926 het hy die Prix de Rome vir skilderkuns ontvang. Van 1929 tot 1931 het hy onder Amédéé Ozenfant in Parys gestudeer.
Hoewel Krenz eers in 1949 na Suid-Afrika gekom het, het hy reeds in 1939 'n uitstalling in Kaapstad gehou. Voor sy koms hierheen het hy jare lank in Nederland gewerk en gewoon. Hy het hom in Kaapstad gevestig, waar hy 'n kunsskool geopen het. Gedurende sy verblyf in Suid-Afrika het hy voortdurend reise onderneem na Europa, die Amerikas, Haïti, Jamaika, Kuba en Zimbabwe.
Sedert 1960 het hy by verskeie geleenthede in Kaapstad, Johannesburg en Pretoria uitgestal. Hy het ook deelgeneem aan die Van Riebeeckfeestentoonstelling in 1952, die Eeufeestentoonstellings in Bulawayo in 1953, die Venesiese Biënnale in 1956, die Sao Paulo-Biënnale in 1960 en die Sao Paulo-Quadrennales in 1956 en 1960. ’n Retrospektiewe uitstalling van sy werk is ’n paar jaar voor sy dood in 1980 deur die Pretoriase Kunsmuseum aangebied. Krenz het nie net in Suid-Afrika uitgestal nie, maar ook in Wene, Boedapest, Milaan, Genève, Venesië, Curaçao, Amsterdam, Londen en by die Salzburgse Kunstefees in 1958. Die Oostenrykse regering het by die laasgenoemde geleentheid ’n ereprofessoraat aan hom toegeken en in 1967 het die Suid-Afrikaanse Akademie hom met ’n erepenning vir skilderkuns vereer.
Bronnelys
wysig- Malherbe, F.E.J.: Alfred Krenz. In: Lantern. Tydskrif vir Kennis en Kultuur. Jaargang 10, nr. 1, September 1960
- Wêreldspektrum, Vol. 16, 7, ISBN 0 908409 57 5