André Walters

André Walters (1940-) is 'n radio-omroeper, TV-persoonlikheid en skakelbeampte.

Biografie

Walters het in sy skoolloopbaan by nie minder as 12 skole skool gegaan nie, en het aan die Hoërskool Jan van Riebeeck in Kaapstad gematrikuleer. Hy het 'n BA-graad in Sielkunde en Engels aan die Universiteit van Stellenbosch behaal. Hy het ook 'n driejarige dramakursus voltooi.

Bydrae tot uitvoerende kunste

In sy vroeë jare het Walters 'n redelike hoeveelheid verhoogwerk gedoen. Hy het byvoorbeeld in 1959 'n rol in Our Town/Ons Dorp gespeel, teenoor Babs Laker in Hedda Gabler (CAPAB 1964) gespeel en "Armand" in Die Dame met die Kamelias vertolk, saam met Berdine Grünewald (1966).

Hy is egter miskien primêr bekend vir sy werk in radio en televisie. Sy eerste uitsaaiwerk was op die Afrikaanse radiodiens. As omroeper was hy 'n pionier van sowel Radio Goeie Hoop (in die 1960's) as Radio Port Natal. In 1979 is hy aangestel as bestuurder van SAUK Ondernemings.

Met die koms van televisie was hy op 'n tyd 'n aanbieder van die natuurleweprogram 50/50 en het ook oorklankingswerk vir SAUK TV gedoen.

As stemakteur het hy in tallose radiodramas verskyn, asook in 'n paar rolprente, soos Eendag op ’n reëndag, Tien oor Tien en Pressure Burst en was 'n gasakteur in die televisiereeks Willem. Hy het ook in die sepies 7de Laan en Egoli gepeel.

Bronne

• The Argus 12 Februarie 1979.
• https://www.imdb.com/title/tt1841579/