Andries Cornelius

Andries Cornelius (1935 – 18 Januarie 1993) was ’n Afrikaans omroeper en skrywer.

Lewe en werk wysig

Andries Cornelius is in 1935 gebore. Hy word aangestel as omroeper by die Suid-Afrikaanse Uitsaaikorporasie SAUK, waar hy gereeld die nuus lees en as sportkommentator van verskeie sporte, insluitende rugby, stoei en snoeker, optree. Vir twee jaar doen hy ook diens by Radio Nederland se Wêreldomroep in Hilversum, waar hy veral help met Afrikaanse programme. Hy word bekroon vir verskeie van sy hoorbeelde. In die vroeë jare sewentig kwalifiseer hy as prokureur en werk vir ’n ruk as regsadviseur vir die Mynwerkersunie, terwyl hy steeds vryskutwerk doen vir die radio. Hy sluit later weer voltyds by die SAUK aan, maar word aan die einde van 1987 afgedank weens ’n arbeidsdispuut met die SAUK.

Vir geruime tyd het hy probleme met sy gesondheid. Na ’n oogoperasie wat onsuksesvol was, eis hy ’n groot bedrag geld van die Garden City-kliniek in Pretoria. Vroeg in Januarie 1993 word sy been afgesit weens swak bloedsomloop, maar die trauma van hierdie behandeling lei daartoe dat hy op Maandag 18 Januarie 1993 aan ’n hartaanval oorlede is. Hy was voorheen getroud en het drie kinders, Willem, Andries en Rebecca.

Skryfwerk wysig

Die vloek van Lamondo” is ’n jeugverhaal wat eers vir die radio geskryf en uitgesaai word, waarna dit ook in boekvorm verskyn. Die verhaal speel hom af tydens ’n skoolvakansie op Lamondo, die Cronjé’s se uitgestrekte wildplaas waar die Republiek en twee buurlande se grense ontmoet. Die sestienjarige Corrie Cronjé se nuwe maat Hennie Fourie is een oggend met die perd en sy geweer weg om ’n luiperd te gaan skiet, maar slegs die bloedbevlekte perd keer teen skemer terug. Die mense wonder of sy verdwyning iets te doen kan hê met die onverklaarbare verdwyning van die inwoners van die twee toordokters se statte hoog teen die berge van Lamondo. Daar het in die onlangse verlede nog op hierdie heilige grond van die voorvaders rituele moord plaasgevind. Corrie en Louis Fourie ontdek die eerste leidrade van wat moontlik met Hennie kon gebeur het, maar die spoor lei hulle na doodsgevaar.Spanningsverhale vir volwassenes is “Bloed op die papawer”, “Nagtrein na L.M.” en “Staatsprokureur Lafras du Preez”.

Publikasies wysig

Jaar Publikasies
1960 Bloed op die papawer
1961 Nagtrein na L.M.
1987 Die vloek van Lamondo
1989 Staatsprokureur Lafras du Preez

Bronnelys wysig

Tydskrifte en koerante wysig

  • Anoniem “Omroeper Cornelius afgedank” “Die Burger” 2 Desember 1987
  • Anoniem “Uitspraak voorbehou in Cornelius saak” “Die Burger” 5 November 1991
  • Eie kantoor “Andries Cornelius dood ná hartaanval” “Die Burger” 20 Januarie 1993

Internet wysig