Annelize van Rooyen

Annelize van Rooyen is ’n Afrikaanse skrywer en joernalis.

Lewe en werk

Annelize van Rooyen is op 1 Maart 1949 gebore. Sy bring haar kinderjare op ’n plaas in Zoeloeland in Natal deur en woon later in Pietermaritzburg en op ’n plaas naby Greytown in die Natalse Middeland. In 1966 matrikuleer sy aan die Hoër Meisieskool Oranje in Bloemfontein en studeer verder aan die Universiteit van Stellenbosch, waar sy ’n B.A.-graad behaal. Sy is vanaf 1973 joernalis by Die Burger, waarna sy in 1975 ’n kursus in die filmwese by die Pretoria Technikon aflê. In 1976 sluit sy by die kunsredaksie van Beeld aan, waar sy haar aanvanklik toelê op die nuwe televisiebedryf. Later word sy Beeld se rolprentresensent, hoof diepteverslaggewer en is dan die eerste redakteur van Beeld se vermaaklikheidsbylae, Kalender. In die vroeë tagtigerjare woon en werk sy vir twee jaar in Londen. Met haar terugkeer na Suid-Afrika werk sy eers by Leserskring en is daarna vir vier jaar redakteur van die mediese blad Praktisyn. Dan is sy werksaam by verskeie uitgewers in die boekbedryf, eers as redakteur, maar lê haar ook toe op boek- en omslagontwerp. Sy stig daarna saam met Etienne van Duyker die ontwerpateljee Alinea Studio. Sy woon deesdae in Mosselbaai.

Die roman “Julia se broer” skryf sy tydens ’n sewe maande verblyf in die Algarve in Portugal. Dit vertel die verhaal van Julia se broer Thys de Wet wat na haar selfdood deur haar persoonlike besittings soek in ’n poging om sin te maak van haar dood en lewe. Hulle was die enigste kinders maar nogtans was hulle verhouding nie baie heg nie. Thys raak nie veel meer wys oor sy suster nie, behalwe dat Julia se rekenaarlêer niks oor hom bevat nie en dat ’n ongetekende testament hom as enigste erfgenaam vervang het. Eindelik is die misterie van die lewe en ander mense se gevoelens steeds ’n geheimenis en word die roman die universele soeke na betekenis en sin, wat meestal op mislukking uitloop. Dit is in hierdie konteks wat die verhaal eindig met Thys se mislukte selfdoodpoging. Hierdie boek is in 1998 op die kortlys vir die toekenning van die M-Net-prys.

Sy skryf ook 'n naslaanwerk oor die herkoms en betekenis van Afrikaanse voorname. Die boek verskyn by drie verskillende uitgewers as “Kies vir u kind die regte naam”, “Die Afrikaanse naamboek” en “’n Naam vir my kind”.

Publikasies

Jaar	Publikasies
1987	Kies vir u kind die regte naam
1994	Die Afrikaanse naamboek
1997	Julia se broer
2002	’n Naam vir my kind

Bronnelys

Boeke

• Kannemeyer, J.C. “Die Afrikaanse literatuur 1652-2004” Human & Rousseau Kaapstad en Pretoria  Eerste uitgawe 2005

Internet

• Stellenbosch Writers: http://www.stellenboschwriters.com/vanrooyena.html
• Worldcat: http://www.worldcat.org/identities/lccn-no95-28015/

Resensies

• Julia se broer
• Olivier, Fanie “Beeld” 10 November 1997
• Van Jaarsveld, A. “Die Volksblad” 30 Maart 1998