Apfelstrudel
Apfelstrudel is 'n tradisionele dis in vele Duitssprekende lande. Die oorsprong van die dis is vanaf Wene, Oostenryk, en dit is een van vele Weense pasteigeregte (Duits: "Strudel").
Die dis is waarskynlik gebaseer op die Turkse baklava. Alhoewel min inligting daaroor bestaan, het die tipe dis moontlik na Wene gekom tydens die belëering van Hongarye deur die Turke in die 16de en 17de eeue. Dit is in Wene geniet tydens die Oostenryks-Hongaarse Koninkryk in die laat 19de eeu.
Apfelstrudel word voorberei deur 'n vulsel gemaak van hoofsaaklik appel, kaneel en rosyne binne 'n uitgerolde deeglaag toe te vou en te bak. Die pastei word buite Oostenryk soms saam met vanieljesous of geklopte room bedien.
Alhoewel baie Afrikaanssprekendes na Apfelstrudel verwys as appeltert, is appelpastei, appelgebak of appelrol dalk 'n beter beskrywende naam om dit te onderskei van die appelterte wat in meeste Suid-Afrikaanse voedselwinkels beskikbaar is.