Asa Briggs

Asa Briggs, Lord Briggs of Lewes (7 Mei 1921 – 15 Maart 2016) was 'n Engelse geskied- en opvoedkundige en akademiese administrateur wat as een van die vernaamste kenners op die gebied van die Victoriaanse tydperk en die geskiedenis van uitsaaiwese beskou is. Met sy navorsing en publikasies oor verskillende aspekte van moderne Britse geskiedenis het Briggs gedurende sy langdurige wetenskaplike loopbaan internasionale erkenning geniet. Baanbrekend was sy bydraes tot onderwys vir volwassenes.

Gedurende die Tweede Wêreldoorlog was Briggs as medewerker by Bletchley Park betrokke, die Churchill-oorlogskabinet se militêre dekoderingsbasis waar geheime Duitse kommunikasie gedekodeer is - waaronder die Enigma-kode. Later sou Briggs ook Winston Churchill se historiese werk oor die Engelssprekende wêreld in vier boekdele, A History of the English-speaking Peoples, proeflees.

As dosent was Asa Briggs aan die Universiteit van Sussex verbonde, die eerste van sewe sogenaamde New Universities of plateglass universities (wat ten opsigte van die moderne glas-en-staal-en-beton-argitektuur van hul kampusse met die historiese klassieke of Gotiese boukuns van historiese instellings gekontrasteer het) wat gedurende die 1960's nuut gestig is en waar hy - as een van die medestigters - ook verskeie administratiewe poste beklee het. Sy bydraes tot onderwys en navorsing by ander tersiêre instellings sowel as openbare en hoër onderwys in die algemeen was ook instrumenteel in die vestiging van die Open University.

In 1976 is hy as lewenslange lid van die Britse Hoërhuis benoem en in 1980 as Fellow of the British Academy (Vennoot van die Britse Akademie) verkies. Reeds in 1970 is hy as lid van die American Academy of Arts and Sciences verkies.

Eers later in sy lewe sou hy onthul dat hy in 1952 as dosent aan die Worcester-kollege te Oxford enkele van sy studente op 'n onkonvensionele pad- en kampeervakansie in die Midde-Ooste saamgeneem het - onder wie die latere Australiese persmagnaat Rupert Murdoch.

Werke

Asa Briggs se gunstelingwerk, die Victoriaanse trilogie (bestaande uit Victorian Things, Victorian People en Victorian Cities) was baanbrekend op die gebied van historiografie met sy nuwe benadering tot Victoriaanse geskiedenis. Briggs het nie geskroom om lig te gooi op die hele bandwydte van die Victoriaanse samelewing nie, sy alledaagse lewe, sy verbruikersgoedere, en selfs sy vulgariteit - aspekte wat voorheen in klassieke geskiedskrywing nouliks aandag geniet het nie. In 1985 is Briggs se werk oor die geskiedenis van die BBC gepubliseer, The BBC: A Short Story of the First Fifty Years. 'n Meer omvattende werk, The History of Broadcasting in the United Kingdom, het in vyf boekdele tussen 1961 en 1995 verskyn.

Eksterne skakels

Media

---

• BBC Radio 4 - Archive on 4: Asa Briggs: The Last Victorian Improver

Tydskrifartikels

---

• History Today, vol. 49, nommer 10, Oktober 1999: Asa Briggs - Daniel Snowman meets the co-founder of the University of Sussex and doyen of Victorian history

Doodsberigte

---

• The Guardian, 15 Maart 2016: Asa Briggs obituary
• The Independent, 15 Maart 2016: Lord Briggs: Churchill aide and code-breaker dies aged 94