Aurora (kruiser)
 Aurora, vasgemeer in Sint Petersburg, Rusland | |
| Loopbaan | .svg){kind=small} 
|
|---|---|
| Bestel: | Junie 1896 |
| Neergelê: | 23 Mei 1897 |
| Tewaterlating: | 11 Mei 1900[1] |
| Indiensstelling: | 16 Julie 1903 |
| Lot: | Museumskip |
| Algemene Eienskappe | |
| Verplasing: | 6 731 t (6 625 lang ton) |
| Lengte: | 126,8 m (416 ft 0 in) |
| Breedte: | 16.8 m |
| Diepgang: | 7.3 m |
| Aandrywing: | 24 Belleville stoomketels 11 610 pk (8 660 kW) |
| Spoed: | 19 knope (35 km/h) |
| Reikafstand: | 7 200 km teen 10 knope (12 km/h) |
| Bemanning: | 590[2] |
| Bewapening: | In 1903: 8 × 152 mm kanonne 24 × 75 mm kanonne 8 × 37 mm kanonne 3 × torpedobuise (twee onderwater) In 1917:14 × 152 mm kanonne |
Aurora (Russies: Авро́ра, Awrora) is 'n Russiese gepantserde kruiser wat tans as museumskip in Sint Petersburg bewaar word. Aurora was een van drie Pallada-klas kruisers, gebou in Sint Petersburg vir diens in die Stille Oseaan. Al drie skepe van hierdie klas het tydens die Russies-Japannese Oorlog gedien. Aurora het die Slag van Tsushima oorleef en is onder Amerikaanse beskerming in die Filippyne geïnterneer, en het uiteindelik na die Baltiese Vloot teruggekeer.
Een van die eerste voorvalle van die Oktober-rewolusie in Rusland het op die kruiser Aurora plaasgevind, wat na bewering die eerste skoot afgevuur het wat die begin van die rewolusie aangedui het.
Russies-Japannese Oorlog
wysigKort ná voltooiing, op 10 Oktober 1903, het Aurora Kronstadt verlaat as deel van Admiraal Wirenius se "versterkende eskader" na Port Arthur.[4] Terwyl hy in die Rooisee was, reeds op pad na Port Arthur, is die eskader teruggeroep na die Oossee, onder protes deur admiraal Makarof, wat admiraal Wirenius spesifiek versoek het om sy sending na Port Arthur voort te sit. Slegs die sewe torpedojaers van die versterkende eskader is toegelaat om na die Verre Ooste voort te gaan.[5]
Ná sy vrystelling van die versterkende eskader en sy aankoms terug na die tuishawe het hy nuwe heraanpassing ondergaan.[6] Ná aanpassings is Aurora teruggeroep na Port Arthur as deel van die Russiese Baltiese Vloot.[7][8] Aurora het as deel van Admiraal Oskar Enkwist se Kruisereskadron gevaar waarvan die vlagskip die beskermde kruiser Oleg sou wees, 'n deel van Admiraal Zinowi Rozjestwenski se Baltiese Vloot.[9] Op pad na die Verre Ooste het Aurora vyf trefslae met ligte skade opgedoen van verwarde vriendelike vuur, wat die skip se kapelaan en 'n matroos in die Doggersbank-voorval gedood het.[10]
Op 27 en 28 Mei 1905 het Aurora saam met die res van die Russiese eskader aan die Slag van Tsushima deelgeneem. Tydens die geveg is sy kaptein, Ewgeni R. Jegorjof, en 14 bemanningslede gedood. Die uitvoerende offisier, kaptein Arkadi Konstantinowitsj Nebolsine, het bevel oorgeneem hoewel hy gewond was. Daarna het Aurora, wat ander baie stadiger Russiese vaartuie beskerm, die vlagskip van skoutadmiraal Enkwist geword, en saam met twee ander Russiese kruisers het hy deurgebreek na neutrale Manila, waar hy van 6 Junie 1905 tot die einde van die oorlog deur die Amerikaanse owerhede geïnterneer is.
In 1906 het Aurora na die Oossee teruggekeer en 'n kadetopleidingskip geword. Van 1906 tot 1912 het die kruiser 'n aantal ander lande besoek; in November 1911 was hy in Bangkok as deel van die vieringe ter ere van die kroning van die nuwe koning van Siam.
Oktober-rewolusiemuitery
wysigTydens die Eerste Wêreldoorlog het Aurora in die Oossee geopereer en patrollies en kusbombardementtake uitgevoer. In 1915 is sy bewapening verander na veertien 152 mm (6 duim)-kanonne. Aan die einde van 1916 is hy na Petrograd (die hernoemde Sint Petersburg) verskuif vir 'n groot versiening. Die stad was vol rewolusionêre aktiwiteite en 'n deel van sy bemanning het by die Februarie-rewolusie van 1917 aangesluit.
Die skip se bevelvoerder, kaptein Michail Nikolski, is dood toe hy probeer het om die opstand te onderdruk.[11] 'n Revolusionêre komitee is op die skip geskep, met Aleksandr Belisjef as kaptein. Die meeste van die bemanning het by die Bolsjewiste aangesluit, wat vir 'n Kommunistiese rewolusie voorberei het.
Om 21:40 op 24 Oktober 1917 (Ou Styl; 6 November Nuwe Styl) het 'n loskruitskoot van sy voorste kanon die begin van die Oktober-rewolusie aangedui. In die somer van 1918 is hy na Kronstadt verplaas en in reserwe geplaas.
Tweede Wêreldoorlog
wysigIn 1922 het Aurora teruggekeer as 'n opleidingskip. Toegewys aan die Baltiese Vloot, vanaf 1923, het hy herhaaldelik die Oosseelande besoek, asook Noorweë in 1924, 1925, 1928 en 1930, Duitsland in 1929 en Swede in 1925 en 1928. Op 2 November 1927 is Aurora die Orde van die Rooi Banier toegeken vir sy rewolusionêre bydrae.
Tydens die Tweede Wêreldoorlog is die kanonne van die skip afgehaal en in die landverdediging van Leningrad gebruik. Die skip self was in die Oranienbaum-hawe (nou Lomonosof) vasgemeer,[12] en is herhaaldelik bestook en gebombardeer. Op 30 September 1941 is hy beskadig en het in die hawe gesink.
In 1944, ten spyte van die vaartuig se toestand, het Aurora die eerste kampus en opleidingsvaartuig van die Nachimof-vlootskool geword.
Ná uitgebreide herstelwerk van 1945 tot 1947 is Aurora permanent geanker op die Newarivier in Leningrad (nou weer Sint Petersburg) as 'n monument vir die Groot Sosialistiese Oktober-rewolusie. In 1957 het hy 'n museumskip geword. Op 22 Februarie 1968 is die Orde van die Oktober-rewolusie aan hom toegeken, waarvan die kenteken Aurora self uitbeeld.
Tot die hede
wysigAs 'n museumskip het die kruiser Aurora een van die vele toeriste-aantreklikhede van Leningrad (nou Sint Petersburg) geword en was steeds 'n simbool van die Oktober-rewolusie en 'n prominente teken van die Russiese geskiedenis. Benewens die museumruimte, het 'n deel van die skip voortgegaan om 'n vlootbemanning te huisves wie se pligte die versorging van die skip, die verskaffing van sekuriteit en deelname aan die regering en militêre seremonies ingesluit het. Die bemanning is as aktiewe diens beskou en was onderhewig aan militêre opleiding en wette.
Nadat dit lank as 'n museumskip gedien het, is die kruiser van 1984 tot 1987 weer in sy konstruksiewerf, die Admiraliteitskeepswerf, geplaas vir herstelwerk. Tydens die opknapping, as gevolg van agteruitgang, is die skeepsromp onder die waterlyn vervang met 'n nuwe gelaste romp volgens die oorspronklike tekeninge. Die afgesnyde onderrompgedeelte is in die Golf van Finland gesleep, na die onvoltooide basis by Ruchi, en naby die kus gesink. Die restourasie het aan die lig gebring dat sommige van die skeepsdele, insluitend die pantserplate, oorspronklik in die Verenigde Koninkryk gemaak is.[13]
Aurora is die oudste aktiewe skip van die Russiese Vloot wat steeds die vlootvaandel hys waaronder hy in gebruik geneem is, maar nou onder die sorg van die Sentrale Vlootmuseum. Hy word steeds beman deur 'n aktiewe diensbemanning onder bevel van 'n kaptein 1ste rang.
In Januarie 2013 het die Russiese minister van verdediging, Sergei Sjoigoe, planne aangekondig om Aurora weer in diens te neem en hom die vlagskip van die Russiese Vloot te maak weens sy historiese en kulturele belang.[14] Op 21 September 2014 is die skip na die Admiraliteitskeepswerf in Kronstadt gesleep om opgeknap te word[12][15] en in 2016 terug te keer.[16] Op 16 Julie 2016 het hy na sy tuishawe in Sint Petersburg teruggekeer.[17]
Verwysings
wysig- ↑ "History". The Cruiser Aurora. Geargiveer vanaf die oorspronklike op 8 Desember 2021. Besoek op 5 Junie 2021.
- ↑ "General information". The Cruiser Aurora. Geargiveer vanaf die oorspronklike op 8 Oktober 2021. Besoek op 5 Junie 2021.
- ↑ Polenov, L.L. (1987). Крейсер «Аврора» [Cruiser "Aurora"] (in Russies). Leningrad: Судостроение. pp. 162–165.
- ↑ Corbett (2015) Vol. 1, bl. 51
- ↑ Corbett (2015) Vol. 1, bl 146, 147
- ↑ Kowner, Rotem (2006). Historical Dictionary of the Russo-Japanese War. The Scarecrow Press. p. 52. ISBN 0-8108-4927-5.
- ↑ Corbett (2015) Vol. 2, Chapters I, VI, X, XI, XIII, XIV
- ↑ British Naval Attache Reports (2003) bl. 354, die nuwe heraanwysing as die 2de Stille Oseaan-eskader is selde gebruik, in beide Corbett-tekste en amptelike Britse vlootattache-verslae, is die term Baltiese Vloot meestal konsekwent gebruik.
- ↑ Corbett (2015) Vol. 2, bl. 194, 215, 273
- ↑ Corbett (2015) Vol. 2, bl. 35
- ↑ Dowling, bl. 571
- ↑ 12,0 12,1 Sávina, Sofía (7 November 2014). "Aurora: The cruiser that sparked a revolution – or did it?". Russia Beyond.
- ↑ "Aurora". Museum Ships.us (in Engels (VSA)). Besoek op 18 Maart 2021.
- ↑ "«Аврора» вернется в строй" ["Aurora" will return to service]. Dve Novosti (in Russies). 27 Januarie 2013. Geargiveer vanaf die oorspronklike op 20 Oktober 2013. Besoek op 5 Junie 2021.
- ↑ RT (21 September 2014). "Russian Revolution Symbol: Iconic 'Aurora' cruiser towed to renovation port". YouTube.
- ↑ "Legendary Aurora to return to its harbour after overhaul in 2016". TASS. 13 Oktober 2014.
- ↑ "Bolshevik Revolution warship Aurora returns to St. Petersburg". The Everett Herald. 16 Julie 2016.