Babelsberg

Babelsberg is die grootste stadsdeel van Potsdam, die hoofstad van die Duitse deelstaat Brandenburg.

Babelsberg het veral as sentrum van die Duitse televisie- en rolprentbedryf bekendheid verwerf. Hier is die rolprentateljee Filmstudio Babelsberg, die Filmpark Babelsberg, die hoofkwartier van die openbare Berlyn-Brandenburgse uitsaaikorporasie RBB, die Universiteit vir Film en Televisie (Hochschule für Film und Fernsehen Potsdam) en die Babelsbergse Filmgimnasium (BFG) gesetel.

Ander bekende besienswaardighede sluit die Park Babelsberg met die naamgewende bergpiek (vroeër ook Pavelberg, Babertsberg of Boberow genoem, afgelei van 'n Slawiese naam wat "Plek van bewers" beteken en later aan die Bybelse Babel of Babilon gelykgestel is), die sentrale buurt (wat tot in 1938 as Nowawes bekend gestaan het), die Babelsberg-kasteel en ander geskiedkundige geboue asook die villabuurt Neubabelsberg wat omstreeks 1900 ontstaan het. Die plaaslike sokkerklub SV Babelsberg 03 het ook buite Potsdam aanhangers.