Bakong
Bakong (Khmer: ប្រាសាទបាគង) is die eerste tempelberg van sandsteen wat die heersers van die Khmer-ryk in Angkor, Kambodja, laat bou het. In die laaste dekades van die 9de eeu was dit die amptelike staatstempel van koning Indravarman I in die antieke stad Hariharalaya, naby die hedendaagse Roluos.
| Bakong | ||
.jpg)
| ||
| Koördinate | 13°20′9.4″N 103°58′26.2″O / 13.335944°N 103.973944°O | |
| Plaaslike naam | ប្រាសាទបាគង | |
| Land |  Kambodja
| |
| Soort | Tempel | |
| Streek | Siem Reap | |
| Geskiedenis | ||
| Bouer | Indravarman I | |
| Gestig | 881 (voltooi) | |
| Tydperk | Middeleeue | |
| Kulture | Khmer-ryk | |
Die struktuur van Bakong is in die vorm van ’n trappiramide, wat in die vroeë Khmer-argitektuur as ’n tempelberg bekend is. Die treffende ooreenkoms in die argitektoniese detail van Bakong en die Borobudur-tempel in Java dui daarop dat Borobudur as prototipe vir Bakong gedien het. Daar moes ’n uitruiling van reisigers, of selfs sendings, tussen die Khmer-ryk en Java plaasgevind het, en so het nie net idees nie, maar ook tegniese en argitektoniese kennis Kambodja bereik.[1]
Terrein wysig
Die terrein waar Bakong staan, is 900 x 700 m groot en bestaan uit drie konsentriese ingeslote areas wat deur twee gragte geskei word; die hoofas is van oos na wes. Die buitenste insluiting het nie ’n muur of poorttoring nie, maar het ’n grag as grens wat vandag net gedeeltelik sigbaar is. Tussen die twee gragte is die ruïnes van nog 22 kleiner tempels van steen. Die binneste insluiting, wat deur ’n laterietmuur omring word, is 160 x 120 m groot en bevat die sentrale tempelpiramide en agt steentorings, twee aan elke sy. ’n Paar ander geboue kom ook in die insluiting voor. Net buite die oostelike poorttoring is ’n moderne Boeddhistetempel.
Die piramide self het vyf vlakke. Bo-op is ’n enkele toring met ’n veel later herkoms, moontlik die 12de eeu.[2] Die piramide was eens met basreliëfs bedek, maar vandag is net fragmente daarvan oor. Groot klipbeelde van olifante staan soos wagters op die hoeke van die drie laer vlakke van die piramide. Beelde van leeus hou wag oor die trappe.
Verwysings wysig
- ↑ David G. Marr; Anthony Crothers Milner (1986). Southeast Asia in the 9th to 14th Centuries. Institute of Southeast Asian Studies, Singapore. p. 244. ISBN 9971-988-39-9. Besoek op 5 Junie 2014.
- ↑ Freeman, Michael; Jacques, Claude (2006). Ancient Angkor. River Books. ISBN 974-8225-27-5.
Eksterne skakels wysig
Wikimedia Commons het meer media in die kategorie Bakong.
Hierdie artikel is vertaal uit die Engelse Wikipedia
Koördinate: 13°20′9.4″N 103°58′26.2″O / 13.335944°N 103.973944°O