Band Aid
Band Aid is 'n organisasie wat in 1984 deur Bob Geldof en Midge Ure gestig is om geld vir mense wat in Ethiopië van honger omkom in te samel. Hulle het talle bekende musikante byeengebring om die liedjie Do They Know It’s Christmas? op te neem. Hulle het ook die Live Aid-konserte in Londen en Philadelphia gereël.[1]
Band Aid | |
|---|---|
| Oorsprong | Londen, Verenigde Koninkryk |
| Genres | Kersfees |
| Jare aktief | 1984 |
| Etikette | Sony Music, Atlantic |
| Assosiasies | Band Aid 20, Band Aid 30, USA for Africa, Hear 'n Aid, Northern Lights |
Die naam Band Aid het 'n dubbele betekenis: 'n band van musici wat hulp verleen, maar tegelykertyd ook die besef dat die projek maar net een pleister op 'n veel groter wond is. Die organisasie is by die Britse Charity Commission geregistreer. Hulle het, as voorbeeld, byna 4 miljoen Britse pond in 2011 aan projekte uitbetaal.[2]
Die liedjie Do they know it's Christmas? is op 28 November 1984 vrygestel. Dit is deur Bob Geldof geskryf en deur Midge Ure vervaardig. Die snit, wat op 25 November in een dag opgeneem is, het in verskeie lande die nommer een posisie op die treffersparade bereik, onder andere in Groot-Brittanje, België en Nederland. Peter Blake het die enkelspeler se omslag ontwerp.
Nadat hongersnood weer in Ethiopië uitgebreek het, het 'n groep kunstenaars in 1989 byeengekom om dieselfde liedjie op te neem. Die groep het hulself Band Aid II genoem, maar die snit was minder suksesvol as die eerste.
In 2004 verskyn 'n derde weergawe onder die naam Band Aid 20, wat verwys na die 20 jaar sedert die eerste opname. Die snit is op 14 November opgeneem en verskyn op 29 November op winkelrakke. Die opbrengste is na Soedan gestuur. Engeland het selfs die belasting wat op die CD's gehef is aan die land geskenk.
'n Vierde weergawe verskyn in 2014 onder die naam Band Aid 30, verwysend na die 30-jaarige viering van die eerste opname. Die snit is op 15 November opgeneem en op 17 November as 'n digitale aflaai beskikbaar gestel. Die opbrengste is aan die slagoffers van die Ebola-uitbraak in Wes-Afrika geskenk.
Verwysings
wysig- ↑ HAT Taal-en-feitegids, Pearson, Desember 2013, ISBN 978-1-77578-243-8
- ↑ "In 2011 werd bijna 4 miljoen Engelse pond uitgekeerd aan projecten". Geargiveer vanaf die oorspronklike op 28 Desember 2012. Besoek op 28 Desember 2012.