Bekentenissen van een gemaskerde
Bekentenissen van een gemaskerde (仮面の告白 Kamen no Kokuhaku?) (Afrikaans: Bekentenisse van 'n gemaskerde, Engels: Confessions of a Mask) is die tweede roman van die Japannese skrywer Yukio Mishima.
Bekentenissen van een gemaskerde
| |
|---|---|
| Skrywer | Yukio Mishima |
| Land |  Japan |
| Taal | Japannees |
| Genre | Roman |
| Uitgewer | |
| Uitgegee | 1949 |
Dit is in 1949 gepubliseer, en het aan hom oombliklike roem besorg, alhoewel hy slegs in sy twintigerjare was.[1]
Storielyn
wysigDaar word na die protagonis in die verhaal verwys as Kochan, wat die diminutiewe vorm is van die skrywer se werklike naam, Kimitake. Aangesien die karakter grootword tydens die era van regse militarisme en imperialisme, sukkel hy van 'n baie jong ouderdom af om in te pas by die samelewing.
Soos Mishima, word Kochan gebore met 'n minder-as-ideale liggaam in terme van fisieke sterkte, en deur die eerste helfte van die boek (wat oor die algemeen 'n beskrywing is van Kochan se jeug) sukkel hy om in te pas by die Japannese samelewing.[2]
Kochan, wat 'n swakkeling is, en boonop ook nog homoseksueel is, word tydens sy grootword jare weggehou van seuns van sy eie ouderdom, en sodoende word hy derhalwe nie blootgestel aan wat die norm daarstel nie. Sy isolasie lei in alle waarskynlikheid tot sy toekomstige fassinasie en fantasieë van dood, geweld, en seks met dieselfde geslag.[3] Sommige het gewys op die ooreenkomste tussen die karakter en Mishima, en gepostuleer dat Mishima soortgelyk is aan die karakter.
Kochan is homoseksueel,[1] en binne die konteks van die Japannese Keiserryk vind hy dit moeilik om stil te bly daaroor. In die vroeëre deel van die roman erken Kochan nog nie openlik dat hy aangetrokke voel tot mans nie, maar bely inderdaad dat hy die manlikheid en krag van mans bewonder terwyl hy geen behae in vroue het nie. Dit sluit 'n bewondering in vir Romaanse beeldhouwerke en standbeelde van mans in dinamiese fisiese posisies. Sommige het al geargumenteer dat die bewondering van manlikheid ten opsigte van Mishima outobiografies van aard is, aangesien hy self hard gewerk het aan sy tengerige voorkoms ten einde 'n puik liggaamsbouer en manlike model te word.
In die eerste hoofstuk van die boek roep Kochan die herinnering op van 'n prenteboek toe hy vier jaar oud was. Selfs op daardie jong ouderdom is Kochan se aandag op byna pornografiese wyse gevestig op 'n enkele prent van 'n heroïese Europese ridder op sy perd. Hy kyk verlangend daarna en steek dit weg; verneder en in die verleentheid wanneer andere sien wat hy doen. Wanneer sy oppasser hom meedeel dat die ridder eintlik Joan van Arckel is word Kochan; wat begeer dat die ridder 'n toonbeeld van manlikheid moet wees, vir altyd afgesit deur die prentjie; geïrriteerd dat 'n vrou manlike klere sou aantrek.
Die woord ‘masker’ is in die titel verweef as gevolg van die feit dat Kochan 'n eie valse persoonlikheid ontwikkel wat hy gebruik om homself voor te stel aan die wêreld. Hy ontwikkel van vroeg af 'n fassinasie met sy vriend Omi se liggaam tydens sy puberteit, en hy glo dat almal om hom ook hul ware gevoelens van mekaar wegsteek en dat almal deelneem aan 'n uitvoerige "teësinnige maskerade". Soos hy groot word probeer hy verlief raak op 'n meisie genaamd Sonoko. Hy word egter herhaaldelik getreiter deur sy latente homoseksuele drange, en kan haar nooit werklik liefhê nie.[1]
Notas
wysig| Hierdie artikel is in sy geheel of gedeeltelik vanuit die Engelse Wikipedia vertaal. |
Verwysings
wysig- ↑ 1,0 1,1 1,2 "Confessions of a Mask". Encyclopedia of Japan. (2012). Tokyo: Shogakukan. URL besoek op 2012-04-14. Geargiveer 25 Augustus 2007 op Wayback Machine
- ↑ "仮面の告白 (Kamen no Kokuhaku)". Nihon Kokugo Daijiten (日本国語大辞典). (2012). Tokyo: Shogakukan. URL besoek op 2012-04-14. Geargiveer 25 Augustus 2007 op Wayback Machine
- ↑ "仮面の告白 (Kamen no kokuhaku)". Nihon Daihyakka Zensho (Nipponika) (日本大百科全書(ニッポニカ). (2012). Tokyo: Shogakukan. URL besoek op 2012-04-14. Geargiveer 25 Augustus 2007 op Wayback Machine