Bietou

Die bietou (Chrysanthemoides monilifera) – ook bekend as die boetabessie – is 'n meerjarige struik wat blom in die lente. Dit is 'n groot, geharde struik met 'n grysgroen loof en geel madeliefieblomme en kan ook as 'n klein boompie voorkom. Die struik kan gebruik as 'n heining of windskerm, en word ook aangeplant aan die kus om sandduine te stabiliseer. Dit verkies son en matige water. Op die SANBI-rooilys, wat die sinonieme genus as Osteospermum aandui, is dit as veilig (LC) gelys. Dié lys vermeld drie subspesies:

• C. m. (L.) Norl. subsp. monlifera. Hierdie subspesie is endemies aan Suid-Afrika.
• C. m. (L.) Norl. subsp. pisifera (L.) Norl. Hierdie subspesie is endemies aan Suid-Afrika.
• C. m. (L.) Norl. subsp. rotundatum (DC.) Norl. Hierdie subspesie is inheems aan Suid-Afrika, maar kom ook elders voor.

Bietou
Wetenskaplike klassifikasie
Koninkryk:	Plantae
(klade):	Angiosperms
(klade):	Eudicots
(klade):	Asterids
Orde:	Asterales
Familie:	Asteraceae
Genus:	Chrysanthemoides
Spesie:	C. monilifera
Binomiale naam
Chrysanthemoides monilifera (L.) Norlindh
Sinonieme
Osteospermum moniliferum L.

Anatomie.

Die naam bietou word egter ook vir sommige ander spesies gebruik.

Vrugte

Die vrugte is heeltemal buitegewoon vir dié familie en enig onder die Suid-Afrikaanse Asteraceae familie omdat hulle vlesig en eetbaar is. Die vrugte was voorheen 'n bron van voedsel vir die Khoimense. Die vrugte is sowat 6 mm in deursnee en word pers wanneer hulle volwasse is.

Bronne

• Die Suid-Afrikaanse Gids- feite en wenke. Isabel Uys. 2009 ISBN 978-1-86919-324-9
• Algemene gids tot BOME. Keith, Paul & Meg Coates Palgrave. 2000. ISBN 1-86872-527-8