Brenda Fassie
Brenda Fassie (* 3 November 1964 – † 9 Mei 2004) was 'n Suid-Afrikaanse popsangeres wat deur menigte gereken word as die stem van die uitgeslote swart mense gedurende die Apartheidsera. Brenda is gebore in Langa, Kaapstad as die jongste van 9 kinders. Sy is vernoem na Brenda Lee, 'n Amerikaanse countrysangeres. Haar vader is oorlede toe sy 2 jaar oud was en met die hulp van haar moeder, 'n pianis, het sy geld begin verdien deur vir toeriste te sing.
Brenda Fassie | |
|---|---|
 | |
| Agtergrondinligting | |
| Gebore | 3 November 1964 Langa, Kaapstad (Suid-Afrika) |
| Sterf | 9 Mei 2004 (op 39) Johannesburg, Suid-Afrika |
| Genres | Pop |
| Beroep(e) | Sangeres |
| Jare aktief | 1981 - 2004 |
| Etikette | CCP Records (EMI) |
In 1981, op die ouderdom van 16, het sy Kaapstad verlaat en na Soweto, Johannesburg gegaan om roem te vind as 'n sangeres. Brenda het eers by die groep Joy aangesluit, en het later die hoofsangeres geword vir die lokasie-popgroep Brenda and the Big Dudes. Sy het 'n seun, Bongani, in 1985 by 'n mede-musikant van die Big Dudes gehad. Brenda het later in 1989 met 'n voormalige gevangene Nhlanhla Mbambo getrou, maar is in 1991 weer van hom geskei. Dit is rondom hierdie tyd dat sy verslaaf geraak het aan kokaïen en haar loopbaan het daaronder gely.
Met baie uitgesproke sieninge en gereelde besoeke aan die armer lokasies van Johannesburg, sowel as liedjies oor lewe in die lokasie, het sy geweldige gewildheid geniet. Sy is die beste bekend vir haar liedjies "Weekend Special" en "Too late for Mama", en is deur Time Magazine in 2001 die "Madonna van die Townships" genoem.
In 'n dwelmverwante voorval in 1995 is sy bewusteloos ontdek saam met die liggaam van haar minnaar, Poppie Sihlahla, wat gesterf het aan 'n skynbare oordosis. Fassie het oorleef en na rehabilitasie het sy haar loopbaan weer op dreef gekry. Sy het egter steeds dwelmprobleme gehad en het ongeveer 30 keer in haar lewe teruggekeer na rehabilitasieklinieke.
Sedert 1996 het sy verskeie solo-albums vrygestel, soos "Now Is The Time", "Memeza" (1997, die topverkoperalbum in Suid-Afrika) en "Nomakanjani?". Die meeste van haar albums het multi-platinum verkopers geword in Suid-Afrika.
Op die oggend van 26 April 2004 het Brenda ineengestort in haar huis in Buccleuch en is opgeneem in die Sunninghill-hospitaal in Johannesburg. Volgens 'n persverklaring het sy 'n hartaanval gehad, maar daar is later berig dat sy in 'n koma gegaan het as gevolg van 'n asma-aanval. Die nadoodse ondersoek het onthul dat sy 'n oordosis kokaïen ingeneem het op die aand van haar ineenstorting en dat dit 'n koma tot gevolg gehad het. Sy het ophou asemhaal en het breinskade opgedoen as gevolg van 'n tekort aan suurstof. Brenda is op 9 Mei 2004 in die ouderdom van 39 oorlede in die hospitaal sonder dat sy weer haar bewussyn kon herwin, nadat die asemhalingsapparaat afgeskakel is. Volgens die Suid-Afrikaanse koerant, die Sunday Times, en die bestuurders van haar musiekmaatskappy het die nadoodse ondersoek ook getoon dat sy MIV-positief was. Haar bestuurder, Peter Snyman, het hierdie aspek van die verslag ontken.
Diskografie
wysig- Brenda Fassie (1994)
- Memeza (1997)
- Thola Amadlozi (2000)
- Brenda The Greatest Hits (2001)
- Gimme Some Volume (2004)