Bryde se walvis

Bryde se walvis (Balaenoptera brydei) is die onbekendste en in baie opsigte die mees ongewone vinwalvis. Hierdie walvisse is klein (in vergelyking met ander vinwalvisse) en weeg nie meer as 25 ton nie. Hulle verkies ook matige en tropiese waters, in vergelyking met die ander vinwalvisse, wat ook volop in poolstreke is. Hierdie walvisse word ook nader aan die kus aangetref en, alhoewel hulle die karakteristieke baardplate besit wat deur baardwalvisse gebruik word om baie klein diertjies mee te vang, bestaan hulle dieet hoofsaaklik uit vis, veral ansjovis en haring.

Bryde se walvis
Vergelyking in grootte met die gemiddelde mens
Bewaringstatus
Nie genoeg data nie
Wetenskaplike klassifikasie
Koninkryk:	Animalia
Filum:	Chordata
Klas:	Mammalia
Subklas:	Eutheria
Orde:	Cetacea
Suborde:	Mysticeti
Familie:	Balaenoptiidae
Genus:	Balaenoptera
Spesie:	B. brydei B. edeni
Binomiale naam
Balaenoptera brydei Olsen, 1913
Balaenoptera edeni Anderson, 1879

Hulle is wydverspreid in tropiese en subtropiese waters, met 'n afsonderlike, dwergspesie wat in die tropiese waters van die Westelike Stille Oseaan en Suid-Oos-Asië aangetref word. Die walvis is vernoem na Johan Bryde (1858 – 1925) wat vroeg in die 20ste eeu die Sweedse konsul in Suid-Afrika was.

Sien ook

• Lys van Suider-Afrikaanse soogdiere
• Lys van Suider-Afrikaanse soogdiere volgens wetenskaplike name
• Suider-Afrikaanse soogdiere en hul ordes