Bunhill Fields
Bunhill Fields
Ligging
Borough of Islington
Londen, Verenigde Koninkryk
Gevestig in
1665
Laaste teraardebestelling in
Februarie 1860
Oppervlakte
4 hektaar
Getal bewaarde grafstene en monumente
2 000
Bunhill Fields is 'n vroeëre begraafplaas in die Londense stadsdeel Borough of Islington, noord van die City of London, wat tans deur die Londense stadsregering (City of London Corporation) as 'n openbare groen ruimte en tuin bestuur word. Dit beslaan tans nog 'n oppervlakte van sowat vier hektaar (9,9 akkers), maar was oorspronklik aansienlik groter.
In die periode tussen 1665 en 1854 is sowat 123 000 oorledenes hier ter ruste gelê. Meer as 2 000 grafstene en monumente het tot vandag toe bewaar gebly. Bunhill Fields was veral onder nie-konformiste 'n gewilde begraafplaas en is die laaste rusplek van bekende persoonlikhede soos John Bunyan († 1688), die skrywer van The Pilgrim's Progress; Daniel Defoe († 1731), die skrywer van Robinson Crusoe; die digter, kunstenaar en mistikus William Blake († 1827); Susanna Wesley († 1742), die moeder van John Wesley; die statistikus en filosoof Thomas Bayes († 1761); en die komponis Isaac Watts († 1748), die "Vader van Himnologie". Ook Suid-Afrika se eerste Engelssprekende digter en kampvegter vir persvryheid Thomas Pringle (1789-1834) het hier sy laaste rusplek gevind. Sy sterflike oorskot is in 1970 in Suid-Afrika herbegrawe.
'n Nabygeleë Kwaker-begraafplaas, wat tussen 1661 en 1855 in gebruik was, het eweneens die naam Bunhill Fields gedra. Een van die bekendste oorledene Kwakers, wat hier ter aarde bestel is, is George Fox († 1691), een van die stigters van dié godsdienstige beweging. Die oorblyfsels van dié begraafplaas dien vandag ook as 'n openbare tuin (Quaker Gardens) wat deur die Londense Borough of Islington se distriksraad bestuur word.
Eksterne skakels
wysig- Algemene inligting
- Geskiedenis