CéU (die "u" in die kunstenares se naam, wat in Portugees "hemel" beteken en [sɛw] uitgespreek word, word met 'n hoofletter gespel) is 'n Brasiliaanse sangeres wat haar eerste Amerikaanse album in April 2007 op die onafhanklike etiket Six Degrees vrygestel het. CéU se burgerlike naam is Maria do Céu Whitaker Poças, en sy is in 1980 in die Suid-Brasiliaanse metropool São Paulo as die dogter van musikale ouers gebore. Haar vader is 'n komponis, arrangeur en musikoloog, wat Maria klassieke Brasiliaanse komponiste soos Heitor Villa-Lobos, Ernesto Nazaré en Orlando Silva laat waardeer het.

CéU
CéU tydens 'n konsert in São Paulo, 13 Augustus 2009
GeboortenaamMaria do Céu Whitaker Poças
Gebore17 April 1980
GenresMúsica Popular Brasileira, soul, rhythm & blues, jazz
Beroep(e)Sangeres, liedjieskryfster
Jare aktief2002 – hede
EtiketteAmbulante / Urban Jungle
Webwerf[www.ceumusic.com/ ceumusic.com]

Op die ouderdom van vyftien jaar het Maria besluit om self 'n musikant te word en in haar laat tienerjare het sy musiekteorie en die violão, Brasilië se nylonbesnaarde kitaar, gestudeer. CéU se musiek weerspieël baie invloede soos byvoorbeeld samba, valsa, choro, soul-, rhythm en blues-, hip hop-, afrobeat- en elektroniese jazzmusiek.

CéU noem die Swart kultuur as een van haar belangrikste invloede en passies, en Afrika as die oorsprong van die meeste van haar musikale wortels. Swart sangeresse soos Billie Holiday, Ella Fitzgerald, Lauryn Hill en Erykah Badu is haar grootste voorbeelde.

Haar eerste album is in 2005 op die onafhanklike etiket Urban Jungle vrygestel, en groot Amerikaanse platemaatskappye het haar genader om die langspeler ook op die Noord-Amerikaanse markte te kan vrystel. Sy het hierdie aansoeke geweier en 'n kontrak met die onafhanklike Amerikaanse etiket Six Degree Records in San Francisco (Kalifornië) aangegaan wat haar meer musikale vryheid toegestaan het. Die album is in samewerking met die Amerikaanse koffiehuis-maatskappy Starbucks vrygestel.

In 2006 het sy 'n Latin Grammy-nominasie gekry as die "beste nuwe kunstenaar" van daardie jaar. CéU het tans ook 'n groot aantal aanhangers in lande soos Frankryk, Nederland, Italië en Kanada, waar een van haar liedere plek 32 op die nasionale popmusiek-trefferlys behaal het. Die Duitse hoëtrou- en musiekvaktydskrifte Audio en stereoplay het haar eerste album CéU vanweë die repertoire en tegniese klankgehalte as "CD van die maand" gekies.

Verwysings wysig

  • Hierdie artikel, of gedeeltes daarvan, is uit die volgende Wikipedia-artikel vertaal: CéU