Carl Maria von Weber (1786–1826) was 'n Duitse komponis, pianis en dirigent. Hy het benewens met die orkeswerke en kamermusiek wat hy gekomponeer het, veral roem verwerf as operakomponis. Carl Maria von Weber is op 18 November 1786 in Eutin in Holstein gebore en het vroeg tekens van musikale talent getoon.

Carl Maria von Weber
Carl Maria von Weber 1814 painting by Thomas Lawrence.jpg
Carl Maria von Weber in 1814, portret deur Thomas Lawrence
Gebore(1786-11-18)18 November 1786
Eutin, Heilige Romeinse Ryk
Sterf5 Junie 1826 (op 39)
Londen, Engeland
GenresKlassieke musiek en opera
Beroep(e)komponis, pianis en dirigent
Jare aktief1798–1826

Hy het sy musiekopleiding by verskillende leermeesters ontvang en sy Opus 1, Ses klein fugas, is in 1798 gepubliseer. In 1800 is sy eerste opera, Das Waldmädchen ("Die woudmeisie"), sonder welslae opgevoer en in 1803 was die eerste opvoering van Peter Schmoll ook 'n mislukking. Hy het egter met sy musiekstudies onder die invloedryke Abbé Vogler volgehou, en deur sy bemiddeling is Weber in 1804 aangestel as Kapellmeister in Breslau.

Sy volgende pos was die van musiekdirekteur vir die hertog van Beiere, vir wie se private orkes hy twee simfonieë gekomponeer het: In 1810 het Weber die Duitse operakomponis Meyerbeer in Darmstadt ontmoet en hy is sterk deur hom beïnvloed. In hierdie tyd het hy die Eerste Groot Konsert in C-majeur en sy eenbedryfopera Abu Hassan (1811) gekomponeer. Na besoeke aan Darmstadt, München en Berlyn is Weber in 1813 aangestel as dirigent van die Praagse Opera.

Sy voortreflike werk in Praag, wat die voorbereiding van sy gehore by wyse van gepubliseerde artikels ingesluit het, het hom bekend gemaak en aan die begin van 1817 is hy aangestel as direkteur van die Dresdense Opera. In dieselfde jaar is hy met die sangeres Caroline Brandt getroud. Benewens sy werk by die Dresden-opera het hy nog tyd gevind om te komponeer.

Die gewilde Uitnodiging tot die Dans en die Konsertstuk, Opus 79, dateer uit sy jare in Dresden. In Dresden het Weber ook die opera Der Freischütz begin komponeer, wat in 1821 met groot welslae in Berlyn opgevoer is. Met hierdie opera en die volgende een, Euryanthe (1823), het Weber die Duitse nasionale opera gevestig en die weg voorberei vir die operas van Richard Wagner.

Afgesien van die gewildheid wat Weber in Duitsland geniet het, het sy roem gou deur Europa versprei. Hy het van Covent Garden (Londen) 'n opdrag ontvang vir ’n opera, Oberon, wat in 1826 met groot welslae in Londen opgevoer is. Weber is op 5 Junie 1826 in Londen oorlede.

BronnelysWysig

Eksterne skakelsWysig

  •   Wikimedia Commons het meer media in die kategorie Carl Maria von Weber.
  • (en) "Carl Maria von Weber". Encyclopædia Britannica. Besoek op 14 Oktober 2019.
  • (en) Carl Maria von Weber by Find a Grave