CasaPound
CasaPound - met volle naam: CasaPound Italia (CPI) - is 'n politieke beweging en voormalige party in Italië wat oorspronklik ná die besetting van 'n leegstaande woonhuis in staatsbesit op 26 Desember 2003 in Rome deur 'n groep jongmense as 'n netwerk van regsgesinde sosiale sentra ontstaan het. Die verskynsel het tot 'n politieke beweging gegroei met die besetting van ander leegstaande geboue, die hou van optogte en betogings en die stigting van 'n verskeidenheid inisiatiewe.
| CasaPound Italia | |
| CasaPound, CPI | |
| Leier | Gianluca Iannone |
|---|---|
| Gestig | 26 Desember 2003 |
| Hoofkwartier | Via Napoleone III, 8 00185 Rome |
| Ideologie | Neo-fascisme, anti-kapitalisme, ultranasionalisme, harde euroskeptisisme, soewereinisme, kritiese standpunte teen immigrasie |
| Amptelike kleure | Swart Rooi |
| Webblad | casapounditalia.org |
»Ons het 'n gebou beset wat jare lank leeg gestaan het. Ons het die huis aan twintig gesinne oorhandig. Ons is Italianers. Ons is geen sosiale buitestanders nie. Ons is werkers, studente, moeders en vaders.«
Naamgewend vir die beweging was die Amerikaanse digter en kritikus Ezra Pound (1885−1972), wat onder meer bekendheid verwerf het as groot bewonderaar van Benito Mussolini en Italiaanse fascisme, en die besette gebou in Rome se armbuurt Esquilino wat na hom CasaPound genoem is. Die kategorisering van CasaPound as neo-fascisties lewer sekere probleme op aangesien die beweging hom afgrens teen tradisionele ver-regse ideologieë, alhoewel aanhangers van CasaPound na hulself as "Fasciste van die derde Millennium" verwys.
Wat die kategorisering van CasaPound bemoeilik, is die propagering van sekere stylelemente en oortuigings, wat aan die Romeinse Ryk, Italiaanse fascisme, avantgarde-futurisme, nonkonformisme en die protesbewegings van 1968 ontleen is, as 'n nuwe fascistiese leefstyl wat die steun van groter dele van die algemene publiek geniet.[1] As 'n teengewig teen linksgesinde alternatiewe subkultuur oefen CasaPound aantrekkingskrag op leerders en studente uit - en word deur tradisioneel linkse groeperings as 'n bedreiging ervaar hoe meer dit oorspronklik linkse politieke tematiek, doelstellings en marxistiese ikone soos Che Guevara oorneem om hulle met moderne estetiek, popkultuur en fascistiese ideologie te kombineer: solidariteit met Tibet, benadeeldes en onderdruktes, stryd teen privatisering, behuisingstekorte en homofobie.[2]
Op 26 Junie 2019 het CasaPound se leier Gianlucas Iannone aangekondig dat CasaPound nie langer as party aan Italië se politieke lewe sal deelneem nie en sy aktiwiteite as suiwer sosiale beweging sal voortsit.[3]
Verwysings wysig
- ↑ bpb.de, 24 Maart 2014 − Jan-Christoph Kitzler: Italien: Casa Pound – Faschismus für das 3. Jahrtausend? Besoek op 6 Mei 2019
- ↑ Martin Lichtmesz: Casa Pound. In: Sezession 34 / Februarie 2010. Besoek op 13 Junie 2019
- ↑ la Repubblica, 27 Junie 2019: Casapound, Iannone: "Finita esperienza di partito, torniamo movimento". Besoek op 19 Julie 2019
Ekstra skakels wysig
- Artikels
- Media