Chiltern Hills
Chiltern Hills
Maak deel uit van die
Suid-Engelse Krytformasie
Strek oor
Oxfordshire
Buckinghamshire
Bedfordshire
Geografiese gegewens
Oppervlakte: 833 km²
Lengte: 74 km
Wydte: 18 km
Ligging in Engeland
Hoogste bergpieke
Haddington Hill (267 m)
Coombe Hill (260 m)
Ivinghoe Beacon (249 m)
Die Chiltern Hills is 'n heuwelreeks in Suidoos-Engeland wat hoofsaaklik uit krytgesteentes bestaan. Die reeks strek vanuit die Teemsrivier in Oxfordshire in 'n suidwes-noordoostelike diagonaal dwarsdeur die hele Buckinghamshire tot by Dunstable in Bedfordshire. Die belangrikste riviere, wat in die reeks ontspring, is Lea, Ver, Misbourne, Chess en Gade.
Die heuwels, waarna plaaslik kort as "the Chilterns" verwys word, kom ooreen met die mees suidelike uitbreiding van die vergletsering tydens die Würmglasiaal en maak deel uit van die Suid-Engelse Krytformasie.
Die hoogste bergpiek in die reeks is Haddington Hill naby Wendover in Buckinghamshire op 'n hoogte van 267 m bo seevlak. Ander noemenswaardige pieke sluit Coombe Hill (260 m) en Ivinghoe Beacon (249 m) in. Die laasgenoemde is die uitgangspunt van twee voetslaanpaaie, Icknield Way en The Ridgeway. The Ridgeway National Trail word onder Groot-Brittanje se oudste paaie gereken en was reeds in die Ystertydperk in gebruik.[1]
Vanweë hul steil hellings het die Dunstable Downs (243 m) in die uiterste ooste van die Chilterns gewild geraak by sweefvlieëniers. Die sagte hellings in die suidweste is dig bebos met beukebome wat hout van hoë gehalte oplewer en die basis vir 'n florerende stoelnywerheid in die omgewing van Chesham en High Wycombe vorm. Reeds in 1965 is 'n groot deel van die heuwelreeks as 'n landskap met uitstekende natuurskoon geklassifiseer (Area of Outstanding Natural Beauty).
Die reeks was naamgewend vir 'n administratiewe distrik in Sentraal-Buckinghamshire (die Chiltern District) en die Chiltern-opelugmuseum.
Verwysings
wysig- ↑ The Green Guide - Great Britain. Boulogne-Billancourt: Michelin Travel Partner 2014, bl. 254