Comité flamand de France
Franse wetenskaplike genootskap
Die Comité flamand de France (Frans vir Vlaamse komitee van Frankryk) is 'n Franse vereniging wat, as 'n wetenskaplike genootskap, hom toespits op die navorsing, beskerming en bevordering van die Vlaamse kultuur in Frans-Vlaandere, met 'n spesifieke belangstelling in die taal, letterkunde en geskiedenis. Dit is op 10 April 1853 in Duinkerken deur Edmond de Coussemaker gestig en is vandag steeds aktief, wat dit een van die oudste wetenskaplike genootskappe in Frankryk maak.
Die komitee beskik oor 'n gespesialiseerde biblioteek in Hazebroek waar al hul eie publikasies sowel as ander streekswerke bewaar en versamel word. Daarbenewens bestuur hulle ook die versamelings van die Museum Jeanne Devos in Wormhout.