Connie Luyt
| Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Connie Luyt is ’n Afrikaanse skrywer wie se boeke ook in Nederlands vertaal word.
Lewe en werk
wysigEna Constantia Roux is op 4 Junie 1946 in Malmesbury in die Kaapprovinsie gebore.[1] Wanneer sy vier jaar oud is verhuis haar ouers na Salisbury in die destydse Rhodesië, waar sy in Engels begin skoolgaan. Hulle trek terug na Johannesburg in Suid-Afrika wanneer sy twaalf jaar oud is en sy matrikuleer aan die Hoërskool Linden, waar Cor Dirks indertyd die hoof was. Hierna studeer sy verder aan die Universiteit van Pretoria, waar sy in 1966 ’n B.A.-graad behaal met Engels, Afrikaans-Nederlands en Geskiedenis as hoofvakke. Sy ontmoet haar toekomstige man, Daan Luyt, op universiteit. In 1967 werk sy in die Transvaalse Argief onder die Uniegebou in Pretoria, waarna sy aan die einde van daardie jaar getroud is. Daan was ’n ingenieur wat ’n beurs by Yskor in Vanderbijlpark moes afwerk en Connie gee dan in Vanderbijlpark vir drie jaar skool by die Hoër Tegniese Skool. Die gesin woon sedert 1971 in Pretoria, waar Connie haar tyd deurbring met die grootmaak van die drie kinders. Hulle besit ook ’n stukkie grond op die walle van die Olifantsrivier naby Hoedspruit. Connie is aktief in die samelewing en is ’n lid van die Mabel Malherbe Leesunie en die Vriende van die Pretoria Biblioteekvereniging, terwyl sy vir baie jare help met die lees van boeke vir opname deur Bandhulp vir Blindes. Sy dien ook op die redaksie van die Lynnwood-gemeente van die NG Kerk se nuusblad
Skryfwerk
wysigAan die begin van die negentigerjare woon sy ’n kortverhaalkursus onder leiding van Johann Lodewyk Marais by die Universiteit van Suid-Afrika by. Aan die einde van die ses maande-kursus kry sy die prys vir die student wat die meeste vordering getoon het, waarna sy ernstig begin skryf vir publikasie. Verskeie van haar kortverhale en artikels word in tydskrifte gepubliseer, waarna sy haar hand waag aan ’n aantal ligte romans. “Boekarest se blomme” is haar eerste roman. In “Romanse op Maanbaai” is Sabrina se jaarlikse vakansie op Maanbaai betowerend totdat ’n onverwagse besoeker haar emosies hoog laat loop. Toe klein Timothy Oukersaand soek raak, besef sy ook wat werklik in haar lewe van belang is.Later waag sy haar hand aan meer komplekse romans.[2] “Lang skaduwees in Afrika” [3] bestaan uit drie hoofstukke wat elk handel oor ’n vrou en haar wedervaringe in Afrika, wat kundig in historiese konteks geplaas word. Elkeen se verhaal beskryf hoe swaarkry en verlies hulle lewens help vorm het. Eerste aan die beurt is die ouma Francine, gevolg deur die dogter Maia en die kleindogter Christine. So beleef die leser die konsentrasiekampe tydens die Anglo-Boereoorlog, ’n verhuising na Kenia ná hierdie oorlog, die bedreiging van die Mau Mau in die vyftigerjare en die terugkeer na Suid-Afrika. Christine keer later terug na Kenia om antwoorde te probeer kry vir die vrae wat sy het. Hierdie boek word in Nederlands vertaal as “Schaduw over Afrika”.[4] “Reën oor die Serengeti” is ’n vervolg op hierdie roman, waar die karakters meestal afstammelinge is van “Lang skaduwees in Afrika” se karakters. Gretchen Schmidt word in Oos-Berlyn groot en die verhaal begin in ’n verwoeste Duitsland na die Tweede Wêreldoorlog. Na die val van die Berlynse muur gaan sy op safari na Afrika, waar haar oupa voorheen op die Serengeti geboer het. In Afrika wil sy berusting vind en haar verlede in Oos-Duitsland agterlaat, asook die man wat onregstreeks haar dogter se dood veroorsaak het. John Barklin is die toergids in die Serengeti, wat nie sy pa se verraad kan vergewe nie. Hierdie boek word in Nederlands vertaal as “Regen over de Serengeti” en is in 2010 op die kortlys vir die toekenning van die ATKV se prys vir die beste liefdesroman. “Meer as een grens”[5] is ’n liefdesroman met ’n sterk spanningslyn. Drie pare gaan saam weg vir ’n naweek, maar dan verdwyn Alexa le Roux spoorloos. Haar minnaar, Ben Steyn, neem deel aan die soektog na haar. Daar is gereelde terugflitse waardeur Ben en Alexa se gedrag verhelder word. Ben was betrokke in die gruwels van die Grensoorlog, wat ’n groot impak op sy lewe gemaak het, terwyl Alexa in haar grootwordjare blootgestel is aan die moord op haar invloedryke grootouers. Die verhaal speel af binne slegs ’n paar dae.Haar kortverhaal “’n Jong vrou en ’n wa” word opgeneem in “Boereoorlogstories 2” onder redaksie van Jeanette Ferreira.
Publikasies
wysig| Jaar | Publikasies |
|---|---|
| 1993 | Boekarest se blomme |
| 1999 | Rose vir Thalia |
| 2005 | Lisa |
| Romanse op Maanbaai | |
| 2006 | Kronkelpad na geluk |
| 2008 | Lang skaduwees in Afrika |
| 2009 | Reën oor die Serengeti |
| 2013 | Meer as een grens |
Bronnelys
wysigTydskrifte en koerante
wysig- Roux, Jaybee “Liewe land” “Huisgenoot” 11 Februarie 2010
Internet
wysig- Green, Phyllis Sarie: http://www.sarie.com/lewe-liefdes/boeke/connie-luyt-oor-haar-grensoorlog-verhaal-meer-een-grens/
- NB-Uitgewers: http://www.nb.co.za/authors/3409 Geargiveer 29 November 2017 op Wayback Machine
- Worldcat: http://www.worldcat.org/search?q=au%3ALuyt%2C+Connie.&qt=hot_author
Ongepubliseerde dokumente
wysig- Luyt, Connie Brief 10 Maart 1995 Nasionale Afrikaanse Letterkundige Museum en Navorsingsentrum (NALN) Bloemfontein