Crossrail is 'n nuwe spoorlyn in die suide van Engeland oor 'n afstand van 118 km (73 myl) wat tans in aanbou is. Dit sal na verwagting in 2018 voltooi wees en vir pendelaars en ander treinpassasiers 'n nuwe roete bied wat in oos-westelike rigting deur Groter Londen sal loop. Boubedrywighede vir die sentrale gedeelte van die lyn - 'n tonnel deur Sentraal-Londen asook verbindings tot bestaande lyne wat later deel van Crossrail sal uitmaak - het in 2009 begin. Crossrail is een van Europa se grootste spoorweg- en infrastruktuurprojekte.

Ada, een van die groot tonnelboormasjiene wat vir die projek gebruik word, in 2012 op pad na Royal Oak Portal

Crossrail se doelwit is om vir pendelaars en ander passasiers op besige treinroetes meer treindienste met groter kapasiteite aan te bied. Die nuwe spoorlyn, wat deur Sentraal-Londen sal loop, sal dele van Berkshire en Buckinghamshire met Essex en Suidoos-Londen verbind en sodoende die druk op moltreindienste soos London Underground se Central en District Line (tans die besigste moltreinroetes in oos-westelike rigting) en die Heathrow-tak van Piccadilly Line gedurende spitstye verlig.

'n Reeks nuwe tonnels oor 'n totale afstand van 42 km (26 myl) staan sentraal in die projek. Die hooftonnels sal vanaf die omgewing van Paddington-stasie deur Sentraal-Londen en Liverpool Street-stasie tot Stratford in Oos-Londen strek. 'n Nuwe taklyn, wat die Teemsrivier kruis, sal vanaf Whitechapel in Oos-Londen tot Canary Wharf en Abbey Road loop. Vir dié taklyn sal 'n nuwe stasie in Woolwich gebou word.

Die nuwe Crossrail-spoorlyn volgens amptelike planne