Canary Wharf

Canary Wharf is 'n sake- en wolkekrabberbuurt in die Londense stadsdistrik Tower Hamlets. Dit is een van Londen se twee finansiële hoofsentrums - naas die historiese middestad of City of London - en huisves baie van die hoogste geboue in die Verenigde Koninkryk, waaronder die tweede hoogste wolkekrabber, One Canada Square.

Canary Wharf
Stadsdeel
Die stadsilhoeët van Canary Wharf, soos gesien vanuit die weste.
Canary Wharf
Koördinate: 51°30′13″N 0°01′06″W
Land	Verenigde Koninkryk
Land	Engeland
Graafskap	Groter Londen
Borough	Tower Hamlets
Bevolking
• Totaal	12 500
Tydsone	UTC±00:00 (MGT)
• Somertyd	UTC+01:00 (BST)
Poskode	E14
Skakelkodes	020

Canary Wharf

Canary Wharf na sononder

'n DLR-trein ry oor die misomhulde Canary Wharf-brug

'n Voetgangerkorridor

Veral sake- en kantoorpersele het hier ontstaan sodat Canary Wharf met 1,3 miljoen m² se kantoor- en winkelruimte in die vraag na gehalte-sakeruimte in Londen voorsien. 730 000 m² hiervan is in besit van die Canary Wharf Group. Canary Wharf bied sowat 90 000 werkgeleenthede en huisves die internasionale of Europese hoofkwartiere van 'n groot aantal banke, professionele dienste-ondernemings en media-organisasies, waaronder Barclays, Citigroup, Crédit Suisse, HSBC, J.P. Morgan, KPMG, MetLife, Morgan Stanley en Thomson Reuters.

Canary Wharf is in die West India Docks op die Isle of Dogs in die East End van Londen geleë. Die kronkel, wat die Teemsrivier hier maak, was nog tot in die vroeë 19de eeu niks meer as 'n moerasgebied nie. Sy ontwikkeling het met grootskaalse droogleggings en die bou van dokke, die West India Docks, in 1802 begin. Dié dokke en aangrensende nywerheidsbuurte het op hul hoogtepunt tot die besigste hawe ter wêreld gegroei. 'n Verskeidenheid invoergoedere is hier gehanteer - van rum tot mahoniehout, later ook landbouprodukte soos piesangs en tomate vanuit die Kanariese Eilande - vandaar die naam Canary Wharf.

Nadat die dokke in 1980 gesluit is, het die Britse regering verskeie projekte begin om die gebied te herontwikkel. So is in 1981 die London Docklands Development Corporation gestig en die Isle of Dogs in 'n sakegebied omgeskep. In 1987 het die Kanadese onderneming Olympia and York 'n kontrak vir die bou van 'n grootskaalse kantoorgebou-projek op die Isle of Dogs onderteken. Boubedrywighede het in die volgende jaar begin.

Die befondsing van basiese openbare vervoerinfrastruktuur was aanvanklik omstrede - die konserwatiewe regering was nie bereid om meer as die helfte van die koste te dra wat daaraan verbonde was nie. So was pendelaars jare lank op die Docklands Light Railway-stelsel aangewese. Eers vanaf 1999 het 'n uitbreiding van die Jubilee Line-moltreinroete Canary Wharf met Sentraal-Londen verbind.