Groot Rif

Die Groot Rif of Donker Rif is in sterrekunde ’n reeks oorvleuelende, donker molekulêre stofwolke tussen die Sonnestelsel en die Carina-Sagittarius-arm van die Melkweg, op ’n afstand van sowat 300 ligjare (3×10¹⁵ kilometer) van die Aarde af. Die wolke bevat na raming sowat ’n miljoen sonmassas plasma en stof.

’n Foto van die Groot Rif, ’n stoflaan in die Melkweg wat hier te sien is van die sterrrebeeld Swaan tot by die Boogskutter. Dit strek nog verder tot by die Sentour.

Eienskappe

Met die blote oog lyk die Groot Rif soos ’n donker streep wat die helder strook van die Melkweg in die lengte verdeel, deur ’n derde van sy inhoud, met stroke helder sterre weerskante.

Dit begin by die sterrebeeld Swaan, waar dit as die Cygnus-rif bekend is. Van daar strek dit tot by die Arend; tot by die Slangdraer, waar dit breër word; tot by die Boogskutter, waar dit die middel van die Melkweg verberg; en eindelik tot by die Sentour. Een van die belangrikste gebiede wat dit verberg, is die Cygnus OB2-assosiasie, ’n groot sterreswerm van jong sterre en een van die grootste stervormingsgebiede naby die Aarde. Soortgelyke donker stroke kan gesien word in ander sterrestelsels, soos NGC 891 in die sterrebeeld Andromeda.

Galery

• 
  ’n Wyehoekbeeld van die Melkweg naby die Swaan waarop die Groot Rif duidelik gesien kan word.
• 
  Die Melkweg met die stoflane vol kleurryke newels tussen die Boogskutter en die Skerpioen.
• 
  Die Melkweg en Groot Rif, met die Baie Groot Teleskoop in Chili op die voorgrond.
• 
  ’n Geheimsinnige ring naby die middel van die Melkweg wat bestaan uit baie digte gas en stof.
• 
  Die sterrestelsel NGC 891 in die sterrebeeld Andromeda, wat omring word deur ’n ewe donker strook.

Eksterne skakels

• Hierdie artikel is vertaal uit die Engelse Wikipedia