Daan Coetzer

Daan Coetzer (gebore 1 Desember 1933 in Rustenburg) is ’n Afrikaanse skrywer. Hy is bekend vir sy roman Bravo Oscar Pappa.

Lewe en werk

Daniël Johannes Coetzer is op 1 Desember 1933 op die plaas Lennoxkraal in die Rustenburg distrik gebore. Hierdie plaas is sowat 20 kilometer wes van Northam. Hy word groot op die plaas Rietfontein 927, wat sowat 50 kilometer noord van Swartruggens geleë is. Sy hele laerskoolopleiding (tot met standerd ses) ontvang hy aan die plaasskool Holfontein Laerskool en gaan dan in 1948 na die Hoërskool Rodeon op Swartruggens, waar hy standerd agt voltooi. Op skool blink hy uit in sport en stel onder andere ’n onder 17 Wes-Transvaalse rekord vir hoogspring op, terwyl hy ook rugby speel vir die skool se eerste span. Weens langdurige siekte herhaal hy standerd sewe en in 1950 verloor sy ouers feitlik al hulle besittings in ’n brand. Hy is genoodsaak om daarvandaan vir homself te sorg en sluit dan aan die begin van 1951 by die polisiediens in Pretoria aan. Hy is ongelukkig met die werk wat hy by die polisie moet doen en koop homself na sy opleiding uit. Op 1 Junie 1951 aanvaar hy dan ’n pos by die Universiteit van Pretoria, waar hy as leerling tegnikus begin werk in die Departement Anatomie van die Fakulteit Veeartsenykunde. Op 2 Julie 1955 trou hy met Anna Johanna Maria Ferreira en uit die huwelik word vier seuns gebore.

In 1961 behaal hy deur deeltydse studie die Nasionale Senior Sertifikaat by die Pretoria Tegniese Kollege en in 1962 kwalifiseer hy as navorsings-tegnikus in vergelykende Anatomie by die Fakulteit Veeartsenykunde. In 1984 verwerf hy ’n goue diploma in Laboratoriumbestuur by die Suid-Afrikaanse Instituut vir Mediese Navorsing. Hy beklee die pos van Beheertegnoloog by die Fakulteit Veeartsenykunde.

Skryfwerk

Sy roman Bravo Oscar Pappa word in 1992 eervol vermeld tydens die toekenning van die ATKV-prys vir goeie gewilde prosa. Dit is ’n spanningsvolle aksieroman wat tydens die bosoorlog afspeel, waar lokval en teen-lokval mekaar vinnig opvolg en alles opbou tot ’n verrassende einde. Hy gebruik die interessante tegniek om uiters geheime teleksboodskappe tussen polisiemanne onderling en die Minister van Polisie te gebruik om hulle rol te verduidelik en die noodsaaklike agtergrond te verskaf.

Publikasies

Jaar	Publikasies
1991	Bravo Oscar Pappa

Bronnelys

Internet

• Die Burger: http://152.111.1.87/argief/berigte/dieburger/1992/03/05/4/5.html

Ongepubliseerde dokumente

• Coetzer, D.J. Lewenskets Nasionale Afrikaanse Letterkundige Museum en Navorsingsentrum (NALN)  Bloemfontein 15 Oktober 1986