Maak hoofkeuseskerm oop

Dag Achatz

Sweedse klassieke pianis
Nota: Meer verwysings en inlyn-aanhalings word in die artikel benodig om geplaasde feite te staaf.

Dag Achatz is 'n Sweedse virtuoos pianis en komponis.[1] Sy opname van sy eie verwerking vir soloklavier van Igor Strawinski se The Rite of Spring vir die BIS Records plate-etiket word wyd gereken as een van die beste opnames van die twintigste eeu. Leonard Bernstein het hom versoek om sy ballet, Fancy Free, te verwerk. Achatz het dit gevolglik saam met sy eie verwerking van Bernstein se Simfoniese Danse uit sy West Side Story opgeneem.

Achatz is in 1942 in Stockholm gebore. Sy moeder is Sweeds en sy vader is van Wene afkomstig, en beide was ook musikante. Achatz is in Switserland grootgemaak en het op agtjarige ouderdom by die Geneefse Konservatoria ingeskryf. Hy het met eerbewyse gegradueer en het sy studies voortgesit by Greta Eriksson in Stockholm; Alfred Cortot en Guido Agosti in Sienna; asook met Susanne Roche en Vlado Perlemuter in Parys.

In 1960 het hy eerste plek behaal tydens die Rudolph Ganz Kompetisie in Lausanne, en in 1964 het hy eerste plek behaal tydens die luisterryke Maria Canals Internasionale Musiekkompetisie in Barcelona. Hy was ook 'n pryswenner tydens die Beierse Radio Kompetisie in München en die Viotti Internasionale Musiekkompetisie in Vercelli. Hy het sedertdien in meer as vyf-en-twintig lande opgetree, asook in die meeste hoof-sentrums van musiek soos Londen, Parys, New York, Boston, Berlyn, Moskou, Sint Petersburg, Wene, Tokio en Beijing.

Achatz het reeds meer as 1,000 uitvoerings gegee en meer as 240 kere saam met orkeste gespeel, insluitende die radio-orkeste van Stockholm, München, Parys, Stuttgart, Turyn, Milaan; die Orchestre de Pasdeloup van Parys, die l'Orchestre de l'Opéra de Monte Carlo, die Gewandhaus van Leipzig, die Staatskapelle van Dresden; asook die Filharmoniese orkeste van Stockholm, Oslo, Barcelona en Lissabon.

Achatz het aan die internasionale musiekfeeste van Montreux, Aix-en-Provence en Savonlina in Finland deelgeneem. Hy het ook saam met gerekende dirigente soos Celibidache, Bernstein, Kertesz, Zinmann, Kamu, Maris Jansons en andere gewerk. Sy meesterklasse het hom na die Academie-Festival des Arcs in Frankryk, die Instituut vir Gevorderde Musiekstudies in Montreux, die Osaka Konservatoria in Japan, en die Umea Internasionale Akademie in Swede, geneem.

Dag Achatz dien gereeld as lid van beoordelingspanele van internasionale kompetisies, insluitende by die Jaen-, Clara Haskil-, Vercelli-, Paryse-, Oporto- en München kompetisies (Beiere Radio-orkeskompetisie) en vele ander. Hy het, wat kamermusiek en liedere betref, saam met die Da Ponte Kwartet, die Fresk Kwartet, en saam met sangers soos Barbara Hendricks, Birgit Finnilä, Hugues Cuenod en Joanna Porackova opgetree, en in musiek vier-hande saam met Yukie Nagai. Hy het meer as 'n dosyn opnames vir BIS, CBS, EMI, Melodiya en Americus Records gemaak. Sy topverkoper CD van die musiek van Gershwin op die BIS plate-etiket is veel geprese; so ook sy opnames van Debussy, Ravel, Skriabin, Schumann, Liszt, Stenhammar, Grieg en vele ander. Hy het gedurende die middel van die sewentigerjare ook saam met die Franse sanger-liedjieskrywer Léo Ferré gewerk.

VerwysingsWysig

  1. "DAG ACHATZ: Stravinsky's Sacre du Printemps". Geargiveer vanaf die oorspronklike op 2010-12-29. Besoek op 2010-01-29. own arrangement for piano, recorded from the Kongressaal in Munich during the Munich Klaviersommer
Hierdie artikel is in sy geheel of gedeeltelik vanuit die Engelse Wikipedia vertaal.