Daisy de Melker

Daisy Louisa C. De Melker (gebore Hancorn-Smith; 1 Junie 1886 – 30 Desember 1932) bekend as Daisy de Melker, was 'n verpleegster wat bekend geraak het nadat sy aangekla is van moord op haar twee vorige mans en seun terwyl sy in Germiston, Suid-Afrika, gewoon het. Sy is skuldig bevind aan die moord op haar seun en op 30 Desember 1932 gehang. Sy is naas Dorethea van der Merwe in 1918 die eerste vrou wat in Suid-Afrika tereggestel is.

Daisy de Melker
Gebore	1 Junie 1886
Oorlede	30 Desember 1932
Rede vir dood	Gehang
Land	Suid-Afrika
Beroep	Verpleegster
Misdaad	Vergiftiging van haar seun en moontlik twee van haar mans
Misdaadbesonderhede
Datum(s)	1923–1932
Slagoffers	Vermoedelik 3
Metode	Vergiftiging
Vonnisbesonderhede
Aangekeer	Augustus 1995
Vonnisdatum	April 1932
Vonnis	Doodvonnis

Die aanklagte dat sy haar mans vermoor het, is nooit in ’n hof bewys nie. Dit was William Sproat, die jonger broer van haar tweede man, wat haar daarvan beskuldig het omdat hy Robert Sproat se testament, waarvolgens hy sy geld aan Daisy nagelaat het, ongeldig verklaar wou hê. Hy het eindelik ’n siviele saak oor die testament gewen.

Vroeë lewe

Daisy Hancorn-Smith is in Seven Fountains naby Grahamstad gebore. Sy was een van elf kinders. Toe sy 12 jaar oud was, het sy na Bulawayo, Rhodesië (nou Zimbabwe), getrek om saam met haar pa en twee van haar broers te woon. Sy het egter kort daarna na Suid-Afrika teruggekeer en by die Berea-versorgingsoord in Durban begin werk.

Verloofde

As 21-jarige was De Melker in 'n liefdesverhouding met Bert Fuller; hy sterf op hul beplande troudag aan gediagnoseerde swartwaterkoors met De Melker aan sy sy. Sy erf £100 uit sy boedel.

Eerste sterfte: William Cowle (eerste man)

Drie jaar later trou sy met William Alfred Cowle, 'n loodgieter. Die huwelik het 14 jaar geduur en een seun is uit die huwelik gebore: Rhodes Cecil. Cowle het ernstig siek geword nadat De Melker hom Engelse sout ingegee het. Die eerste dokter wat hom ondersoek het, het nie gedink dit is iets ernstigs nie, maar kort daarna het sy toestand versleg. Sy vrou het die bure se hulp gevra en ’n ander dokter gebel. Dié het hom blou in die gesig en met skuim om die mond aangetref. Cowle is kort daarna oorlede.

Die dokter het strignienvergiftiging vermoed en geweier om die doodsertifikaat te onderteken. Ná ’n lykskouing deur die waarnemende distriksgeneesheer is egter beslis die oorsaak van sy dood was natuurlik. Daisy het £1 245 uit 'n polis en 'n pensioen van £533 gekry.

Tweede sterfte: Robert Sproat (tweede man)

Drie jaar later, op 36, het Daisy met nog ’n loodgieter, Robert Sproat, getrou. Hy was 10 jaar ouer as sy. In Oktober 1927 het hy ernstig siek geword. Hy het maagkrampe en sametrekkings gekry, nes Cowle, maar het herstel. 'n Maand later het hy weer siek geword nadat hy bier in die geselskap van sy vrou en stiefseun gedrink het. Hy is ná die tweede aanval oorlede en Daisy het £4 560 uit sy boedel geërf, plus nog £560 uit sy pensioenfonds.

Derde sterfte: Rhodes Cecil Cowle (seun)

Daisy het op 21 Januarie 1931 getrou met Sydney de Melker, 'n 1906-Springbok-rugbyspeler. Laat in Februarie 1932 het De Melker van Germiston na Turffontein gereis om arseen by ’n apteker te koop. Sy het haar vorige getroude van, Sproat, gebruik en beweer sy wou ’n siek kat doodmaak.

Minder as ’n week later, op 2 Maart, het haar seun, Rhodes, siek geword nadat hy koffie gedrink het wat sy ma in 'n fles berei het. ’n Medewerker, James Webster, het ook siek geword. Webster, wat baie min van die koffie gedrink het, het ná ’n paar dae herstel. Rhodes is egter op 5 Maart oorlede. ’n Lykskouing het gevolg en die oorsaak van sy dood is bepaal as serebrale malaria. De Melker het £100 uit Rhodes se lewenspolis ontvang. Hy was net 20 jaar oud.

Arres, verhoor en teregstelling

Ná Rhodes se dood het William Sproat, die broer van haar tweede man, agterdogtig geraak. Hy het die polisie ingelig en die lyke van Cowle, Sproat en Rhodes is opgegrawe. Arseen is in haar seun se lyk gekry en strignien in die oorskot van haar twee gewese mans. Laasgenoemde twee se bene het ’n pienk kleur gehad, wat daarop dui hulle het pienk strignien, wat in dié tyd algemeen was, ingekry. Spore van arseen is ook gevind in die hare en vingernaels van James Webster, Rhodes se kollega wat oorleef het.

’n Week later het die polisie De Melker in hegtenis geneem en aangekla van die moorde op die drie mans. Koerante het die storie breedvoerig gedek. Die apteker wat die arseen aan "mev. Sproat" verkoop het, het haar foto herken en na die polisie gegaan.

De Melker se verhoor het 30 dae geduur. Volgens die regter kon die staat nie bo redelike twyfel bewys Cowle en Sproat is aan strignienvergiftiging dood nie. Sy is egter aan die moord op haar seun skuldig bevind en op 30 Desember 1932 in Pretoria gehang, terwyl sy volgehou het sy is onskuldig. Sy was toe 46 jaar oud.

Ná haar dood is haar meubels op 'n veiling verkoop. Die koper van haar gramradio het dit vir herstelwerk ingestuur. Die tegnikus ontdek toe binne-in die gramradio 'n koevert met die woorde For dear old Syd. Binne-in die koevert was arseen.

Sien ook

• Lys van Suid-Afrikaanse reeksmoordenaars

Bron

• Hy glo enduit in sy Daisy. Rapport. 30 Desember 2012.